चांद्रयान- 3 खातीर गोंयचे कंपनीची मजत

भांगरभूंय | प्रतिनिधी

गोंयकारां खातीर अभिमानाची गजाल

पणजी ः भारताच्या चांद्रयान- 3 चे शुक्रारा चंद्राचे वटेन येसस्वीपणान प्रक्षेपण जाले. हाचे येसस्वीपणान उड्डाण जाल्ल्यान पिळर्ण उद्देगीक वसाहतीतल्या किनेको कमान कंपोजिट्स इंडिया प्रा. लिमिटेड कंपनीच्या 700 कामगारांक खोशी जाली. कारण ह्या यानाचे चार खूब म्हत्वाचे घटक ह्या कामगारांनी हे कंपनीत तयार केल्ले. ह्या येसा खातीर मुख्यमंत्री डॉ. प्रमोद सावंत हांणी तांकां परबीं दिल्यां.
ह्या यानाचे चार म्हत्वाचे भाग तयार करपाक किनेको कमान कंपोजिट्स इंडिया कंपनीन व्हड योगदान दिलां. ह्या यानात एक अत्याधुनीक रोबोट बसयला. तो 23 ऑगस्टाक चंद्राच्या पृश्ठभागाचेर देंवतलो आनी माती, धुल्ल, वातावरणांतले घटक आदी म्हायती इस्रोक धाडटलो. होच रोबोट चंद्राचेर व्हरपा खातीर यान तयार केला. ताका एलव्हीएम 3- 4 अशें नांव दिलां. ह्या यानाचे वजन 642 टन आसा. ताची उंचाय 43.5 मीटर आसा. देखूनच ह्या यानाक बाहुबली म्हणलां. अर्थांत हें यान श्रीहरिकोट्टांत तयार केल्लें ना. ताचे वेगवेगळे भाग देशांतल्या वेगवेगळ्या कंपनींनी तयार केल्यांत. उपरांत श्रीहरिकोट्टांत तांकां एकठांय जोडटात.
शेखर सरदेसाय हांचे पिळर्णचे किनेको कमान कंपोजिट्स इंडिया प्रायव्हेट लिमिटेड कंपनीन हातूंत व्हड योगदान दिलां.
किनेको कंपनी आनी अमेरिकेंतली कमान एयरोस्पेस गट संयुक्तपणान काम करतात. ताचो वावर जायत्या देशांनी चालू आसा. विमान आनी अंतरिक्षयान वचपी उपग्रह हांचे संरचनात्मक घटक आनी असेंब्ली तयार करपाक ही कंपनी वावुरता. जागतीक एरोस्पेस आनी संरक्षण कंपनींच्यो वाडट्यो गरजो भागोवपाच्या हेतान किनेको कंपनीची थापणूक केली. हे कंपनीचें मुखेल कार्यालय पीळर्ण उद्देगीक वसाहतीत आसा. ती कार्बन आनी कंवचेच्या तंतू साहित्याचो आनी ऑटोक्लेव्ह क्युरींग तंत्रज्ञान वापरून एरोस्पेस आनी संरक्षण उपेगा खातीर प्रगत संमिश्र संरचनात्मक भाग आनी असेंब्ली तयार करता. तशेंच ही कंपनी विमान, हेलिकॉप्टर आनी अंतरिक्षयान हांचे भाग तयार करता.