भांगरभूंय | प्रतिनिधी
म्हापशें: वागातोरा एका हॉटेलाचे कुडींत ठाणें महाराष्ट्रांतल्या एका पर्यटक बायलेचो विनयभंग जाल्लो. ह्या प्रकरणांत दुबावीत आरोपी व्हिक्टर वॅन निकेर्क ह्या दक्षीण आफ्रिकन नागरिकाक हणजूण पुलिसांनी दोन वर्सांनी मुंबय सावन अटक केली.
हो प्रकार फाटल्या 8 मार्च 2021 दिसा घडिल्लो. कागाळदार बायल वागातोर हांगासरल्या ग्रीन स्पेस हॉस्टेल ह्या हॉटेलांत देंविल्ली. त्याच हॉटेलांत दुबावीत आरोपी म्युझिशीयन म्हूण काम करतालो. कागाळदार बायल कुडींत एकलीच आशिल्ल्याची संद सादून दुबावितान भितर प्रवेश केलो आनी तिचो गळो अंदिलो. तशेंच तोंडांत हात घालून तिचो जबडो ओडलो. कागाळदारान दुबाविताचे तावडेंतल्यान सुटका केली आनी बोवाळ घालो तेन्ना दुबावितान धांव मारली.
ह्या प्रकरणांत हणजूण पुलिसांनी भादंसंच्या 448, 323, 354 कलमा खाला गुन्यांव दाखल केल्लो. सोद घेवन लेगीत दुबावीत पुलिसांक सांपडूंक नाशिल्लो. ताका लागून दुबावीत सांपडूंक नाशिल्ल्यान म्हापशेंच्या न्यायालयान ए फायनस समरी प्रमाण हें प्रकरण तात्पुरतें बंद केल्लें.
दुबावीत आरोपी कुलुबा मुंबय हांगा आशिल्ल्याची म्हायती पुलिसांक मेळ्ळी. ते प्रमाण पुलीस पंगडान मुंबय धांव घेवन दुबाविताचो सोद घेतलो आनी कुलुबा हांगा ताका धरून अटक केली. ताका लागून दुबावीत दोन वर्सां चार म्हयन्यांनी हणजूण पुलिसांचे तावडेंत सांपडलो.
पुलीस निरिक्षक प्रशल नायक देसाय हांच्या मार्गदर्शना खाला उपनिरिक्षक तुकाराम पेडणेंकार, कॉन्स्टेबल दिपेश चोडणकार, अनिकेत पेडणेंकार ह्या पंगडान मुंबय पुलिसांचे मजतीन ही कामगिरी केली. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
