भांगरभूंय | प्रतिनिधी
म्हापशें: एका 16 वर्सा पिरायेचे तरणाटेक फूस लावन उबारून व्हरून आनी तिचेर लिंगीक अत्याचार केल्ल्याच्या आरोपा खाला म्हापशें पुलिसांनी दुबाविताक दावनगिरी कर्नाटक सावन अटक केली. मोहम्मद सलीम राजाबल्ली (23, रा. बेतीं, बार्देस आनी मूळ बाशानगर कर्नाटक) अशें दुबाविताचें नांव आसून पिडीत चलयेची पुलिसांनी सुटका केली.
ही अपहरणाची घडणूक फाटल्या 10 जुलय दिसा घडिल्ली. पिडीत 16 वर्सा पिरायेची तरणाटी म्हापशें बस स्टॅण्डा वयल्यान बेपत्ता जाल्ली. ह्या प्रकरणांत पुलीस स्टेशनार तिच्या पालकांनी कागाळ नोंद केल्ली. ह्या कागाळीच्या आदारान पुलिसांनी अनवळख्या आड अपहरणाचो गुन्यांव नोंद केल्लो.
चवकशे वेळार पिडीत तरणाटी बाशानगर दावनगिरी कर्नाटक हांगा आशिल्ल्याची म्हायती पुलिसांक मेळ्ळी. ते प्रमाण पुलीस पंगड कर्नाटकांत गेलो आनी तांणी पिडितेची सुटका करून दुबावीत आरोपीक ताब्यांत घेतलो.
उपरांत तांकां म्हापश्यां हाडून पुलिसांनी पिडितेची जबानी आनी वैजकी तपासणी केली. हे चवकशेंत दुबावितान पिडितेचेर लिंगीक अत्याचार केल्ल्याचें दिसून आयलें. ते प्रमाण पुलिसांनी दुबाविता आड अपहरण आनी लिंगीक अत्याचार केल्ल्याच्या आरोपा खाला भादंसंच्या कलम 363, 376 तशेंच गोंय बाल कायदो आनी पोक्सो कायद्या खाला गुन्यांव नोंद करून दुबाविताक अटक केली.
पुलीस निरिक्षक सीताकांत नायक हांच्या मार्गदर्शना खाला उपनिरिक्षक गौरव नायक, रिचा भोसले, विराज कोरगांवकार, दिनेशकुमार मुखीया, हवालदार सुशांत चोपडेंकार, कॉन्स्टेबल अक्षय पाटील आनी प्राजक्ता झाल्बा ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
