भांगरभूंय | प्रतिनिधी
9 म्हयन्याच्या बाळकाक मरण
भांगरभूंय । खबरां संस्था
फ्लोरिडा: अमेरिकेंतल्या फ्लोरिडांत हालींच काळजाक पीळ घालपा सारकी गजाल घडली. एका 9 म्हयन्याच्या बाळकाक मरण आयिल्ल्यान ह्या वाठारांत दुख्ख पातळ्ळां.
मरण आयिल्ल्या बाळकाचे आवयन सांगिल्लें प्रमाण, तिच्या फॉर्मुला दुदांत फेंटॅनायल (एके तरेचें वखद) मिस्तुराद केल्ल्याचें सांगलें.
पुलिसांच्या म्हणण्या प्रमाण 26 जूनाक एका घरांत ल्हान भुरगें बेशुद्ध अवस्थेंत मेळ्ळें.
नासाऊ काउंटी शेरीफ बिल लीपर हांणी, डिप्टीन सीपीआरचे मजतीन भुरग्यांक परत जिवे करपाचो यत्न केलो. पूण ताचे कडेन हें शक्य जावंक ना आनी उपचारा मजगतीं, एका हॉस्पिटलांत ताका मरण आयलें अशें तांणी कळयलें.
मेळिल्ले म्हायती प्रमाण, ह्या बाळकाचे 17 पिरायेचें आवयन सुरवातेक चवकशे वेळार पुलिसांक सांगलें, आपल्या भुरग्याक कितें जालां हाची तिकां कांयच जाणीव लेगीत नाशिल्ली. पूण तपासा उपरांत अजाप करपा सारकी गजाल उक्ताडार आयली.
बाळकाचे कुडीची तपासणी केली तेन्ना ताचे कुडींत 10 जाणांक मारपाची तांक आशिल्ले फेंटॅनायल वखदाचे अंश सांपडिले.
चवकशे वेळार बाळकाचे आवयन सांगलें, आपूण थकिल्ल्यान न्हिदेंत आसली. पूण भुरगें व्हडल्यान रडपाक लागिल्ल्यान तिका न्हिंदपाक मेळूंक ना. चलो बेगीन न्हिंदचो देखून दूदांत तिणें फेंटॅनायल वखद घालून भुरग्याक दिलें.
भुरगें बेगीन न्हिंदचें म्हणून दुदांत घातलें वखद
बाळकाचे आवयन पुलिसां मुखार कबूल करतना म्हणलें, आपणें बाटलेंत फॉर्म्युला आनी फेंटॅनायल वखद घातलेें (जें तिका कोकेन दिसलें). उपरांत तें फेंटॅनायल आशिल्ल्याचें कळून आयलें. तशेंच तें फकत कोकेन, हें पिल्यार चलो रोखडोच न्हिदतलो अशें समजून तें तिणें बाळकाक पिवपाक दिले.
हे घडणुकेंतले बायलेचें नांव जाहीर करूंक ना. पूण तिचेर खून आनी प्रतिबंधीत वखदां बाळगिल्ल्याचो आरोप केला. हे घडणुकेचो फुडलो तपास नासाऊ काउंटी शेरीफ कार्यालय आनी फ्लोरिडा विभाग करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
