भांगरभूंय | प्रतिनिधी
पणजी : चिंबलाचो टॅक्सी धनी जयेश चोडणकार हाच्या खुना प्रकरणांत बंदखणींत आशिल्ले आयआरबीचो निलंबीत पुलीस प्रीतेश अडकोणकार आनी कृपेश वळवयकार हांणी उत्तर गोंय जिल्हो आनी सत्र न्यायालयांत जामिना खातीर अर्ज दाखल केला. शेनवारा पुलीस ह्या अर्जाचेर आपली बाजू मांडटले.
पार्किंगाच्या विशयाचेर 5 जुलयाक चिंबला जंक्शनाचेर खाजगी बशीच्या मालका कडेन जयेशाचो वाद जाल्लो. तेच राती सुमार 11 वरांचेर जयेश पांय चिडिल्ले अवस्थेंत सांपडलो. ह्या प्रकरणांत हिट अँड रन आनी मारपेटाची केस नोंद जाल्ली. तशेंच मारपेट प्रकरणांत प्रितेश आनी कृपेश हांकां अटक केल्ली. चवकशे उपरांत तो खून आशिल्ल्याचें दिसून आयलें आनी पुलिसांनी ती केस नोंद केली. 12 जुलयाक कुटुंबान जयेशाची कूड ताब्यांत घेतली.
मजगतीं, दोनूय दुबावीत अटक जाले उपरांत न्यायालयाच्या ताब्यांत आशिल्ले. 12 जुलयाक तांकां 5 दीस पुलिसांच्या ताब्यांत धाडले. आतां तांणी उत्तर गोंयच्या जिल्लो आनी सत्र न्यायालयांत जामीनाचो अर्ज केला. शेनवारा जावपी सुनावणे वेळार पुलीस आपली बाजू मांडपाचे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
