भांगरभूंय | प्रतिनिधी
पणजी: कांय दिसांनी श्रावण, शिरवाण म्हयन्याक सुरवात जातली. सध्या चलता तो अधिक श्रावण. हो म्हयनो विवीध परबांचो. खुबशे लोक ह्या म्हयन्यांत सोरो पियेवप, नुस्तें- मांस खावप बंद करतात. श्रावणाक शंकराचो आवडटो म्हयनो अशें मानतात. ताका लागून ह्या पवित्र म्हयन्यांत मांस खावप, सोरो पियेवप योग्य न्हय, असो लोकांचो समज. कांय लोक हाचेर विश्वास दवरिनात. ते श्रावणांत सगळें खातात. मागीर तें तांकां माल वता.
धर्मीक नदरेनूच न्हय तर श्रावणांत मांस, हेर वेसनांचो त्याग करप भलायकेचेय नदरेन फायद्याचें. सोरो, मांस, तेलकट खावप ह्या म्हयन्यांत उणें करचें अशें विज्ञान सांगता.
श्रावणांत अनवाळें कित्याक रावचें?
श्रावण हो प्रजनन म्हयनो मानतात. चडशीं जनावरां ह्या म्हयन्यांत प्रजनन करतात. गुरवार आशिल्लें खंयचेंय जनावर आमी खाल्यार आमचे कुडीक त्रास जावं येता.
तशेंच गुरवार जनावरांचें मांस खाल्यार आमचे कुडींत हार्मोनल बदल घडटात. जाका लागून फुडाराक जायते रोग जावंक शकतात, अशें विज्ञान मानता.
श्रावणांत सगळे कडेन धुकें (धुंवटें, दवाची दाट पड्डो) आसता. सुर्य दिसना. वन नाशिल्ल्यान आमची पचन शक्त हालता. मांस हें तामसी अन्न. तें सहज पचना. ताका लागून भलायकी इबाडटा. श्रावणांत मांस खाल्यार विवीध रोगांक आमंत्रणूच आसता, अशें दोतोरांचें म्हणणें.
श्रावण म्हयन्यान सतत पावस पडिल्ल्यान संसर्गजन्य दुयेंसां पातळटात. ते पयलीं जनावरांक लागू जातात. ताका लागून ह्या दिसांनी शिवराक जेवणाचो वापर केल्यार दुयेंसां जावपाची शक्यताय उणी आसता. आयुर्वेदूय श्रावणांत सोरो आनी मांसाच्या जेवणाचो त्याग करपाक सांगता. रोग प्रतिकार शक्त उणी आशिल्ल्यान कितेंय प्रमाणा भायर खाल्यार मनीस रोखडोच दुयेंत पडटा. मांस, मसाले आशिल्लें जेवण श्रावणांत विवीध दुयेसांक कारण थारता, अशें आयुर्वेद मानता. तेन्ना श्रावणांत सात्विक आहार घेयात. शक्यतो शिवराक जेवात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
