युरिक अॅसिड नियंत्रणात कशें दवरप?
भांगरभूंय | प्रतिनिधी
पणजी ः मनशाचे कुडींत युरिक अॅसिड वाडत जाल्यार जायतीं दुयेंसां जातात. ताका लागून संधिवात, कात तांबडी जावप अशें त्रास जातात. देखून युरिक अॅसिडाचेर नियंत्रण दवरप खूब म्हत्वाचें.
दोतोरांच्या मतान मूत्रपिंडाची गाळपाची तांक उणी जाता तेन्ना हाडां मदल्या पृश्ठाचेर अम्लाच्या रुपांत युरिया एकठांय जावपाक लागता. ताका लागून संधिवात जाता. मागीर कुडीचे स्नायू सुजतात. देखून दुखता. ही दुखणी मान, धोंपरा आनी पांयाच्या घोंट्याक जातात. कांय जाणांची कातय तांबडी जाता आनी थाकाय जाणवता.
हुस्क्याची गजाल म्हळ्यार 30 ते 40 वर्सां पिरायेचेर लेगीत युरिक अॅसिडाची पातळी वाडत आसता. हाचें मुखेल कारण म्हळ्यार खावपाच्यो चुकीच्यो संवयी. खावपाचे संवयीचेर लक्ष दिवपाची गरज आसा.
युरिक अॅसिड कित्याक वाडटा?
- अयोग्य आहार
- वायट जिणे पद्दत
- गोडेंमूत दुयेंसाची वखदां घेवप
- तांबडें मांस (बिफ, पोर्क) आनी नुस्तें, खुबे, तिसऱ्यो चड प्रमाणांत खावप
- अति व्यायाम करप
नियंत्रण कशें दवरप?
हाचे खातीर आहारांत कांय बदल करचे पडटले. दोतोरांच्या मतान, युरिक अॅसिड उणें करपाक आहारांत तंतूचो (फायबर) आस्पाव करप गरजेचें. पाचवी भाजी, कड्डणां आनी ओट्स हांचो आस्पाव आहारांत तंतू खातीर करूं येता. गरजे भायर वखदां घेवचीं न्हय. हेंय म्हत्वाचें. दोतोरान वखद कांय दिसां खातीर घेवपाक सांगलां जाल्यार फकत त्या दिसां पुरतेंच तें घेवचें. सदांच योग्य आनी संतुळीत आहार करप. अरबट- चरबट खावचें न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
