भांगरभूंय | प्रतिनिधी
मडगांव: मडगांव रावणफोंड सर्कला कुशीक धांवत्या ट्रकान रस्त्याचे कुशीक चलून वचप्याक फरफटायत ओडून व्हेलो. उपचारा वेळार चलून वचपी महादेव सतरकार (61) हांकां मरण आयलें. धपको दिवन पळून गेल्ल्या ट्रकाचो सोद पुलीस घेतात.
रावणफोंड सर्कला कुशीक बिरेस्तारा सांजवेळा 8 वरांच्या सुमाराक हो अपघात जालो. महादेव सतरकार रावणफोंड सर्कला कडल्यान आपल्या रावत्या कुडी कडेन चलत वताले. ह्या वेळार रावणफोंड सर्कला कडल्यान येवपी ट्रकान गतीन व्हॉल्त घेवन रस्त्याचे कुशीक सावन चलपी महादेव हांकां ह्या ट्रकान सुमार 20 फूट फरफटायत ओडून व्हेलो. हातूंत महादेव गंभीर जखमी जाले. तांचो एक हात आनी पांय निकामी जाले आनी व्हड प्रमाणांत रगत व्हांवूंक लागलें.
उपरांत जखमी अवस्थेंत महादेव सतरकार हांकां दक्षीण गोंय जिल्हो हॉस्पिटलांत व्हेलो. पूण उपचारा वेळार तांकां मरण आयलें. मडगांव पुलिसांनी घडणुकेचो पंचनामो करून अपघाता उपरांत पळून गेल्ल्या ट्रक चालकाचो सोद घेतात अशें पुलिसांनी सांगलें.
मेळिल्ले म्हायती प्रमाण महादेव सतरकार हे कालकोंडा हांगासरल्या कृष्णाच्या देवळा कुशीक रावताले. गांधी मार्केटांतल्या एका कपड्याच्या दुकानांत ते काम करताले. वाठारांतले लोक तांकां भावोजी ह्या नांवान वळखताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
