… आनी तांणी बियरीची बाटली आपलेच तकलेर फोडली
भांगरभूंय | प्रतिनिधी
वास्को : मांगूर वाठारांत गस्त घालपी पुलिसांक मारपेट केल्ल्याच्या आरोपा वयल्यान अमित कामत (18) आनी फहाद तिनवाले (25) ह्या दोग तरणाट्यांक अटक केल्या.
वास्को पुलिसांनी दिल्ले म्हायती प्रमाण, पीएसआय मयूर सावंत आनी मुखेल हवालदार जयेश गांवकार रातच्या वेळार गस्त घालताले. देडांक सुमार ते मांगूर पावतकच तांकां दोग तरणाटे रस्त्यार बसून बियर पियेतना दिसले. तांकां विचारलें तेन्ना ते फुर्योज जाले आनी वाद घालपाक लागले. तांणी जयेश गांवकाराक धुकल्लो आनी अचकीत बियरीची बाटली तकलेचेर फोडून स्वताक जखम करून घेतली. तांचे तकलेक आनी मानेक जखम जाल्या.
मागीर पुलिसांनी मारपेट केली, असो दावो तांणी केलो. पुलिसांनी दोगांय जाणांक पुलीस स्टेशनांत व्हेले थंयूय तांणी बोवाळ घालपाक सुरवात केली. उपरांत पुलिसांनी तांचे आड गुन्यांव नोंद केलो.
मुखेल हवालदार सुरेश दासर हे पीआय कपिल नायक हांचे देखरेखी खाला आनी मुरगांव डीव्हाएसपी सलीम शेख हांच्या मार्गदर्शना खाला फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
