भांगरभूंय | प्रतिनिधी
म्हापशें: वळावली-पोंबुर्फें सावन आदले दुस्मानकायेंतल्यान पुंडलीक बोर्डेकार आनी साल्वादोर फेर्रांव (रा. जयदेववाडो, नास्नोळें) ह्या दोगां तरणाट्यांचेर खुनी हल्लो जाल्लो. ह्या प्रकरणांतलो दुबावीत आरोपी संदीप कांदोळकार आनी नवनाथ कांदोळकार (सुकूर, बार्देस) हांणी आत्मसमर्पण केले उपरांत पुलिसांनी तांकां अटक केली. दोनूय दुबावितांक न्यायालयान चार दीस पुलीस कोठी दिल्या.
फाटल्या 25 मे दिसा मध्यान रातीं 12.15 वरांच्या सुमाराक हो जिवघेणो हल्ल्याचो प्रकार घडिल्लो. जखमी पुंडलीक बोर्डेकार आनी साल्वादोर फेर्रांव हे दोगूय दुचाकी वयल्यान पोंबुर्फ्यां वताले. त्याच वेळार वाटेर वळावली हांगा देंवतर वयल्या दुबावितां सयत स जाणांनी तांचेर हल्लो केलो.
रस्त्यार उडोवन तांकां हॉकी स्टीक आनी सोऱ्याच्या बाटल्यांच्या आदारान दोगांकूय मारपेट करून जखमी केल्ले. जखमी पुंडलीक बोर्डेकाराचो भाव कालिदास बोर्डेकारान दिल्ले कागाळीच्या आदाराचेर म्हापशें पुलिासंनी भा.दं.सं.च्या 307, 341, 504, 324, 506(2), 427 आनी 34 कलमा खाला खुनी हल्ल्याचो गुन्यांव नोंद केल्लो.
ह्या प्रकरणांत अटक टाळपा खातीर दुबावीत आरोपी संदीप कांदोळकार आनी नवनाथ कांदोळकार हांणी अटकपूर्व जामिना खातीर न्यायालयांत धांव घेतिल्ली. पूण 9 जून दिसा पणजेंतल्या उत्तर गोंय जिल्हो सत्र न्यायालयान सुनावणी घेवन तांचो जामीन अर्ज भायरायिल्लो. तेन्ना सावन दुबावीत आरोपी फरार आशिल्ले. सोमारा 10 वेर रातीं दोगूय दुबावितांनी पुलिसां कडेन आत्मसमर्पण केलें.
ह्या प्रकरणाचो फुडलो तपास म्हापशेंचे उपनिरिक्षक यशवंत मांद्रेंकार वरिश्ठांच्या मार्गदर्शना खाला करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
