पेडण्यां सरकारी गाडयांक कळम

भांगरभूंय | प्रतिनिधी

कोयराचें बल्ल म्हूण लोक करतात वापर

पेडणे ः पेडणे तालुक्यांत व्हड प्रमाणांत पोरणीं सरकारी वाहनां कळमेल्लीं दिश्टी पडतात. आनी ह्या वाहनांक लागून पावसाच्या दिसांनी तांतूत पावसाचे उदक सांठून जळारां जावपाक लागल्यांत. भलायकी खात्यान योग्य उपाय करचे आनी बेगोबेग ह्यो गाडयो त्या जाग्यां वयल्यान काडून उडोवच्यो अशी मागणी नागरिकांनी केल्या.
तालुक्यांत वट्ट 20 ग्रामपंचायती आनी एक नगरपालिका आसा. वेळार दुरुस्ती जावंक नाशिल्ल्यान ह्या गाडयांक कळम लागल्या आनी त्या कारणाक लागून सरकारान लोकांचे लाखांनी न्हय तर कोट्यांनी रुपया खर्च केल्यात असो दावो नागरिकांचो आसा. ही वाहनां दरेका पंचायतीक वा पालिकेक आनी सरकारी खात्याक खासदार निधींतल्यान दिल्यांत.
सरकारान गरजे खातीर ह्यो अॅम्ब्युलन्सी आनी हेर वाहनां दिलीं, पूण त्या खात्यान तांची वेळार दुरुस्ती आनी देखभाल करुंक नाशिल्ल्यान कार्यालया फाटल्यान, ऑफिसाच्या मुखार जायत्या सुवातेर ही कळमेल्लीं वाहनां आमकां दिसतात. दरेक पंचायतीन आनी नगरपालिकेन योग्य दखल घेवन ह्या वाहनांचो विलो लावपाची गरज आसा. सरकारान वा खासदार निधींतल्यान पंचायतींक वाहनां दिल्यांत तांणी योग्य वेळार दखल घेवन गाडयो सारक्यो केल्यार त्यो बरे स्थितींत उरूंक शकतात. पूण सरकार ताचे कडेन आडनदर करता अशें दिसता. जेन्ना ग्राम पंचायत आनी पेडणें नगरपालिका नवीन वाहनां विकतीं घेता आनी भौसाक सुविधा दिता, तेन्ना त्या वाहनांची वेळार दुरुस्ती करपाची जापसालदारकी पंचायत आनी नगरपालिकेची आसता. पेडण्यांच न्हय तर हेर कडेनूय असल्यो गाडयो आसा. तातूंत लोकांनी सोरो, बियरीच्यो बाटल्यो आनी हेर सामान उडयिल्लें आसात. थोडक्यांत त्यो कोयरा पेटयो जाल्यात.