भांगरभूंय | प्रतिनिधी
वाळपय शारांत येरादारीची कोंयडी; अबकारी खात्या वतीन वाहनांची तपासणी
वाळपय: काल (आयतारा) सत्तरी म्हालांतल्या सगल्या घसघशांचेर गर्दी पळोवंक मेळ्ळी. वाळपय शारांत सुमारा भायर गर्दी जाल्ली. दीसभर खूबशे फावटी येरादारीची कोंयडी जावपाचे प्रकार घडले. उटंगाराचो पावस पडत आशिल्ल्यान घसघशांचेर आनंद घेवपा खातीर व्हड प्रमाणांत लोकांनी गर्दी केल्ली. वाळपयचे बाजारपेठेचेर हाचो अनुकूल परिणाम जाल्ल्याचें पळोवंक मेळ्ळें. फुडले चार म्हयने वाळपय शारांत शेनवार आनी आयतार अशेच तरेची गर्दी पळोवंक मेळटली. तेच प्रमाण घसघशांचेर व्हड प्रमाणांत पर्यटक भेट दिवपाची शक्यताय आसा.
सगल्या घसघशांचेर लोकांची गर्दी
सत्तरी म्हालांतल्या सगल्याच घसघशांचेर सकाळ सावन पर्यटकांची रांग लागिल्ली. दुचाकी चार चाकी वाहनांतल्यान व्हड प्रमाणांत पर्यटक घसघशाचेर वचत आशिल्ल्याचें पळोवंक मेळ्ळें. पाली, चरवणें, हिवरें, सालेली, कोदाळ तेच प्रमाण हेर घसघशांचेर व्हड प्रमाणांत पर्यटकांनी भेटी दिल्ल्याची म्हायती उपलब्ध जाल्या. फाटल्या चार दिसां सावन सत्तरी म्हालाच्या दोंगराळ वाठारांत नेटाचो पावस पडत आसा. हाका लागून सत्तरी म्हालांतले सगले घसघशे प्रवाहीत जाल्यात.
दुचाकी, चार चाकी वाहनांची गर्दी
ह्या संदर्भांत एक नदर मारली तेन्ना घसघशाचेर वचपा खातीर हाडिल्लीं दुचाकी आनी चार चाकी वाहनां खूबशे कडेन पार्क करून दवरिल्लीं. पाली चरवणें, हिवरें ह्या वाठारांनी वाहनांची व्हड प्रमाणांत गर्दी आशिल्ल्याचें चित्र पळोवंक मेळ्ळें. ह्या वाठारांनी खूबशे फावटी येरादारीची कोंयडी जावपाचे प्रकार घडले. पूण उपरांत येरादारी सुरळीत जाली.
अबकारी खात्या कडल्यान झडटी
अबकारी खात्याच्या वाळपय विभागा कडल्यान काल खर तापसणी हातांत घेतिल्ली. जाग्याजाग्यांनी कर्मचारी तैनात केल्ले. सगल्या घसघशांचेर वचपी दुचाकी आनी चार चाकी वाहनांची झडटी घेतली. हातूंत कांय प्रमाणांत सोऱ्याच्यो बाटल्यो जप्त केल्यो. खूबशा जाणांचेर दंडात्मक कारवाय केल्ल्याचें निरिक्षक हनुमंतराव देसाय हांणी स्पश्ट केलें. केरी वाठारांतल्या चोर्ला घांट वाठारांत वचपी सगल्या वाहनांची केरी कडक तपासणी करताले. तेच प्रमाण पाली मार्गान बेळगांव वचपी वाहनांची तपासणी जांभूळ जंक्शन हांगा करताले.
पुलिसांचो खर बांदोबस्त
वाळपयचे पुलीस निरिक्षक दिनेश गडेकार हांच्या फुडारपणा खाला घसघशाचे सुवातेर पुलीस बंदोबस्त तयार दवरिल्लो. हे विशीं तांचे कडेन संपर्क सादलो तेन्ना तांणी सांगलें, वेगळ्यावेगळ्या घसघशांचे सुवातेर पुलीस तैनात केल्ले. पर्यटकांचो धांगडधिंगाणो आडावपा खातीर ही वेवस्था केल्ल्याचें गडेकार हांणी सांगलें. खंयचेच सुवातेर अनुचीत प्रकार घडूंक नाशिल्ल्याचें तांणी मुखार उलयतना सांगलें.
मजगतीं, सकाळ सावन घसघशार वचपा खातीर गोंयच्या वेगळ्यावेगळ्या वाठारांतल्यान व्हड प्रमाणांत पर्यटक दुचाकी आनी चारचाकी वाहनांतल्यान आयिल्ले. खूबशा वाठारांतल्यान प्रवासी बशीची वेवस्था करून लोक आयिल्ले. ताका लागून सकाळ सावन शारांत सांजवेळ मेरेन खूबशे फावटी येरादारीची कोंयडी जावपाचे प्रकार घडले. खास करून वाळपय नगरपालिकेच्या मुखा वयल्या भागांत येरादारी सेगीत खंडीत जाताली. कारण खूबशे पर्यटक सोरो खरेदी करपा खातीर आनी हॉटेला वयले पदार्थ खरेदी करपा खातीर थंय रावताले. ताका लागून येरादारी कोंयडेचो प्रकार घडलो. हाका लागून सर्वसामान्य लोकांक मात हाचो मनस्पात सोंसचो पडलो.
वाळपय बाजारपेठेचेर अनुकूल परिणाम
वाळपय बाजारपेठेचेर हाचो अनुकूल परिणाम जाल्ल्याचें पळोवंक मेळ्ळें. गोंयच्या वेगळ्यावेगळ्या वाठारांतल्यान पर्यटक आयिल्ले. तांणी उदकाच्यो बाटल्यो, सोऱ्याच्यो बाटल्यो आनी हॉटेलां वयले खाद्य पदार्थ खरेदी करपाचेर भर दिलो. हाका लागून ताचो बाजारपेठेचेर बरो परिणाम जाल्ल्याचें चित्र पळोवंक मेळ्ळें. सकाळीं ते दनपारां 12 वरां मेरेन आनी उपरांत सांजवेळा स वरां मेरेन शारांत लोकांची अक्षरशा गर्दी जाल्ल्याचें पळोवंक मेळ्ळें. हाचो बरो परिणाम मात बाजारपेठेचेर जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
