भांगरभूंय | प्रतिनिधी
प्रदुशणमुक्त प्रकल्प हाडपाचो उक्तायलो विचार
काणकोण: लोलयें पंचायत वाठारांतल्या इडदर ह्या प्रभागांत येवपी भगवती सड्याची काल (आयतारा) सांजवेळा समाज कल्याण मंत्री आनी मनरिजवण सोसायटीचे अध्यक्ष सुभाष फळदेसाय हांणी पळोवणी केली. तांचे सयत सिने मळा वयले लोक तशेंच लोलयें कोमुनिदादीचे पदाधिकारी भूषण प्रभुगांवकार, शैलेश प्रभुगांवकार, महादेव शास्त्री, भाजपाचे पदाधिकारी संजीव तिळवे हाजीर आशिल्ले.
पत्रकारांक भेटीची म्हायती मेळ्ळे उपरांत पत्रकारांनी फळदेसाय हांची भेट घेवन विचारतकूच तांणी सांगलें, ज्यो पडींग जमनी आसात तातूंत प्रदुशण विरयत प्रकल्प हाडून गोंयच्या रोजगाराचो प्रस्न कांय प्रमाणांत सोडोवपाचे नदरेन आयची भेट आसा. ह्या सड्यार सिने सृश्टी, आयआयटी, रोप वे आनी हेर व्हड प्रकल्प हाडपाचो सद्या विचार सुरू आसा. पूण नेमकें कितें करतले तें थारायिल्लें ना अशें फळदेसाय हांणी सांगलें.
सांग्यार आयआयटी संबंदी सगल्या पंचायतींनी ग्रामसभेंत सहमती दाखयल्या आनी सांग्यार आयआयटी जावपाचे नदरेन यत्न करतले. पूण दक्षीण गोंयांतल्या शेंकड्यांनी नागरिकांनी सगले प्रकल्प उत्तर गोंयांतूच जायत आशिल्ल्यान निरशेवणी उक्तायिल्ल्यान दक्षीण गोंयांत रोजगाराभिमूख प्रकल्प हाडपाचो विचार आशिल्ल्यान ह्या सड्याची पळोवणी केल्या. काणकोणच्या लोकांक विस्वासांत घेवनूच हांगा प्रकल्प हाडटले. जो प्रकल्प हाडटले तो पर्यावरणाचें लुकसाण न करता, जैवविविधता सांबाळूनच आनी काणकोणच्या भुरग्यांक रोजगार मेळपाचे नदरेनूच हाडटले अशें फळदेसाय हांणी सांगलें.
मजगतीं, फाटल्या 11 वर्सां पयलीं हांगा आयआयटी हाडपाचो यत्न केल्लो. पूण हांगासरल्या लोकांच्या खर विरोधाक लागून हो प्रकल्प जावंक शकलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
