भांगरभूंय | प्रतिनिधी
भांगरभूंय । सांस्कृतीक प्रतिनिधी
पणजी : संजीवन संगीत स्टुडिओची थापणूक गोंयच्या संगीत क्षेत्रा खातीर एक फायदेशीर आनी प्रगतीशील पावल आसा. ह्या स्टुडियोंत फकत रेकॉर्डिंग जावचें ना तर बऱ्या दर्जाचे रेकॉर्डिंग आनी ध्वनी अभियंते तयार जातले, अशें नामनेचे गायक पं. सुरेश वाडकार हांणी सांगलें ‘स्वस्तिक’ पणजेच्या संजीवन संगीत स्टुडिओचें उक्तावण जाले उपरांत मुखेल सोयरे म्हूण पं. वाडकार उलयताले. उक्तावण सुवाळ्यांत मानाचे सोयरे डॉ. अजीत शिरोडकार,
उद्देजक राजेश धेंपे, राजदीप बिल्डर्साचे धनी राजेश तारकार, खाशेले सोयरे गोवा मराठी अकादमीचे अध्यक्ष प्राचार्य अनिल सामंत, तशेंच स्वस्तिकचे अध्यक्ष डॉ. प्रवीण गावकर आनी सचीव योगिता याजी हाजीर आशिल्लीं.
संगीत आनी कलेचें आमच्या जिवितांत व्हड म्हत्व आसा हें जाणून घेवन भुरग्यांक ल्हान पिराये सावन शास्त्रीय संगीताची वळख करून दिवपाची गरज आसा अशें प्राचार्य अनिल सामंत हांणी सांगलें. व्हड प्रमाणांत संगीत तयार करपा वांगडाच संगीताचो दर्जो वाडोवपाचेर भर दिवपाक जाय. ह्या स्टुडिओची स्थापणूक गोंयच्या इतिहासांत उल्लेखनीय असो खीण आसा. स्वस्तिकाचो स्टुडिओ गोंयच्या संगीत मळाक वळण दिवपी थारूं शकता असोय विस्वास तांणी उक्तायलो. सुरश्री केसरबाय केरकार, गानतपविनी मोगुबाय कुर्डीकार सारक्या व्हड कलाकारांची देख घेवन संगीतांत अतुलनीय काम करपाचें आवाहन तांणी तरणाट्या कलाकारांक केलें.
गायकांनी रेकॉर्डिंग स्टुडिओंत येवन मायका मुखार गायतना जतनाय घेवपाच्यो गजाली, रेकॉर्डिंग करतना उच्चार कसो करचो, रेकॉर्डिंग खातीर खंयच्यो गजाली म्हत्वाच्यो हे विशीं शिकचें अशें पं. सुरेश वाडकार हांणी सांगलें.
डॉ. प्रवीण गावकारान येवकार दिलो आनी स्टुडिओ स्थापन करपा फाटलो उद्देश आनी म्हत्व सांगलें. ह्या वेळार पं. वाडकारान कांय गीतां सादर करून प्रेक्षकांचें मनोरंजन केलें. मानसी वाळवे हांणी संचालन केलें. योगिता याजीन उपकार मानले.
संजीव संगीत स्टुडिओचें उक्तावण करतना पं. सुरेश वाडकर हांचे वांगडा राजेश धेंपे, राजेश तारकार, डाॅ. अजीत शिरोडकर आनी डॉ. प्रवीण गांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
