भांगरभूंय | प्रतिनिधी
3 म्हयन्यांत 1133 लोक मेले, 30 लाखांचें स्थलांतर
भांगरभूंय । खबरां संस्था
खार्टुम : उत्तर आफ्रिकेंतल्या सुदान देशांत फाटले 3 म्हयने लश्करी आनी निम लश्करी सैन्या मदीं झगडीं चालू आसात. राजधानी खारतूम लागसार आशिल्ल्या ओमदुरमान शारांत दीस आनी रातभर हवाई हल्ले जाले. हातूंत 22 जाणांक मरण आयलां आनी जायते जाण जखमी जाल्यात. अल जजीराच्या म्हणण्या प्रमाण, शारांतल्या वाठारांत हो हल्लो आतां मेरेनचो सगळ्यांत घातक आसा.
निम लश्करी दळाच्या म्हणण्या प्रमाण, ह्या हल्ल्यांत 31 नागरिकांक मरण आयलां. लश्करान निवासी वाठारांक लक्ष्य केलें.
विमान आनी ड्रोनान हल्ले
मजगतीं, हांगा रावपी एका जाण्टेल्यान सांगलें – हो हल्लो कोणे केलो तें सांगप कठीण. कितलेशेच दीस लश्कर आपल्या विमानांनी आरएसएफाक (नीम लश्करी दळ) ह्या वाठारांत लक्ष्य करता. त्याच वेळार आरएसएफय ड्रोनांनी तांचेर सतत हल्लो करीत आसा.
सुदानाच्या भलायकी मंत्रालयाच्या म्हणण्या प्रमाण, 15 एप्रील सावन ह्या झुजांत 1,133 जाणांक मरण आयलां. त्याच वेळार सुमार ३० लाख लोक घरां सोडून गेल्यात. तातूंतले सुमार 7 लाख लोक शेजारच्या देशांनी रावतात.
बलात्काराच्यो घडणुको
संयुक्त राष्ट्र संघटनेच्या एजन्सीच्या म्हणण्या प्रमाण, 3 म्हयन्यांच्या झगड्यांत बायलांचेर बलात्कार आनी चलयांचें अपहरण करपाच्योय केशी आयल्यात. अमेरिका, सावदी अरेबिया सारक्या देशांनीय दोनूय सैन्यां मदीं झुजबंदी करपाचो जायते फावट यत्न केलो, पूण ते अपेशी थारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
