भांगरभूंय | प्रतिनिधी
पुलीस स्टेशन हल्लो प्रकरणांत बाबूश, जेनिफर हांची मागणी
मडगांव: महसूल मंत्री बाबूश मोंसेरात हांचे सयत हेरां आड पणजी पुलीस स्टेशना वयल्या हल्लो प्रकरणांतली सुनावणी दक्षीण गोंय जिल्हो विशेश न्यायालयांत सुरू आसा. पणजी पुलीस स्टेशनाचे आदले निरिक्षक सुदेश नायक हांणी सुनावणे वेळार उदय मडकयकार, दयानंद कारापूरकार, कारोलीना पो हांचे सयत वट्ट आठ दुबावितांची वळख पटयली. मजगतीं, बाबूश आनी आमदार जेनिफर मोंसेरात हांणी ह्या खटल्याक कायमची गैरहाजीर रावपाची परवानगी मेळची असो अर्ज न्यायालयांत सादर केला.
बाबूश मोंसेरात आनी तांच्या समर्थकांनी 19 फेब्रुवारी 2008 दिसा पणजी पुलीस स्टेशनार हल्लो केल्ल्या प्रकरणांत दक्षीण गोंय जिल्हो न्यायालयांतले सुनावणे वेळार तेन्नाचे पुलीस निरिक्षक सुदेश नायक हांची साक्ष नोंद करप सुरू आसा. हाचे आदीं सुदेश नायक हांणी ब्रायन गुदिन्हो हांचे वेल्या हल्ल्यांत वांटेकार आशिल्ल्यांचेर कारवाय करपाची मागणी करीत सुमार 800 जाणांचो जमाव पुलीस स्टेशनार हाडलो आनी बाबूश हांणी ताचें फुडारपण केलें आनी चिथावन घालपी उलोवपां केल्ल्याचेंय सांगिल्लें.
फाटले सुनावणे वेळार सुदेश नायक हांणी हल्लो प्रकरणांत आंदोलकांनी वापरिल्ले फातर, बॅनर, गाडयो आनी हेर पुरावे न्यायालया मुखार सादर केल्ले. जाल्यार फाटले सुनावणे वेळार बाबूश मोंसेरात, जेनिफर मोंसेरात हांचे सयत आनीक दोगांची वळख पटयली.
शुक्रारचे सुनावणे वेळार बाबूश मोंसेरात गैरहाजीर आशिल्ले, जाल्यार जेनिफर मोंसेरात आनी हेर दुबावीत हाजीर आशिल्ले. ह्या खटल्याच्या सुनावणे वेळार कायमची गैरहाजीर रावपाची परवानगी मेळची असो अर्ज बाबूश आनी जेनिफर हांणी केला. हाचे पयलीं बाबूश हांकां लिंगीक अत्याचार प्रकरणांत गैरहाजीर रावपाची परवानगी मेळ्ळ्या.
सुनावणे वेळार सुदेश नायक हांची साक्ष मुखार सुरू केली आनी दुबावितांची वळख पटयली. ह्या वेळार सुदेश नायक हांणी आंदोलना वेळार वापरिल्ले गाडयेची वळख पटयली. तशेंच आदले महापौर उदय मडकयकार, दयानंद कारापूरकार, कारोलिना पो हांचे सयत आनीक पांच दुबावितांची वळख पटयली. फाटले सुनावणे वेळार सुदेश नायक हांणी बाबूश, जेनिफर सयत चार जाणांची वळख पटयिल्ली, जाल्यार ह्या वेळार आनीक आठ जाणांची वळख पटयल्या. तशेंच एके बायल दुबाविताची वळख पटोवपाक जमलें ना. हाचे मुखा वयली सुनावणी 14 जुलय दिसा दनपारां 2.30 वरांचेर जातली. ह्या वेळार सगल्या दुबावितांक हाजीर रावपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
