भांगरभूंय | प्रतिनिधी
नोकरीचें दाखयिल्लें हांयस; दोगां दलालांक अटक
म्हापशें: गोंयांत इव्हेंट मॅनजमेंट कंपनींत नोकरी दिवपाचें हांयस दाखोवन हाडिल्ल्या तिगां मदल्या एका तरणाटेन पुलिसां कडेन संपर्क सादून आपली सुटका करून घेतली. ह्या प्रकरणांत कळंगूट पुलिसांनी दुबावीत मंजीत सिंग (33, रा. पंजाब) आनी मोहम्मद शकील अहमद (52, रा. तेलगंण) ह्या दलालांक अटक केली.
शुक्रारा सांजवेळा कळंगूट पुलिसांनी डोंगरपूर, नायकावाडो, कळंगूटे एका भाड्याचे कुडीचेर धाड घालून ह्या तीन तरणाट्या चलयांची सुटका केली. ह्यो चलयो पंजाब राज्यांतल्यो आसात. दुबावितांनी ह्या तरणाट्या चलयांक इव्हेंट मॅनेजमेंट कंपनींत नोकरी दिवपाचें हांयस दाखोवन बुधवारा विमानान गोंयांत हाडिल्लीं. त्यो 20 ते 23 वर्सा पिराये गटांतल्यो आसात.
गोंयांत हाडले उपरांत तांकां कळंगूटे भाड्याचे कुडींत दवरलीं आपल्याक फटोवन अनैतीक धंद्यांत गुंतोवपा खातीर हाडिल्ल्याची सुलूस ह्या चलयांक लागिल्ली. शुक्रारा सांजवेळा तिगां मदल्या एके चलयेन संद सादून पुलिसां कडेन संपर्क सादलो आनी आमकां तिगां चलयांक कोंडून दवरिल्ल्याची म्हायती तिणें पुलिसांक दिली.
हे म्हायतीच्या आदाराचेर पुलीस निरिक्षक परेश नायक हांच्या फुडारपणा खाला पुलिसांनी डोंगरपूर हांगा त्या कुडीचेर धाड घालून त्या चलयांची सुटका केली.
उपरांत पुलिसांनी वयल्या दोनूय दलालांक अटक केली, पिडीत चलयांक मेरशी सुधार घरांत धाडून दिल्यात. पुलिसांनी दुबावितां आड भादंसंच्या 370, 370 (3), 34 आनी शिंदळकी वेवसाय प्रतिबंधक कायदो कलम 3, 4, 5 आनी 7 खाला गुन्यांव नोंद केला. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
