भांगरभूंय | प्रतिनिधी
मडगांव: मडगांवच्या किरकोळ नुस्त्या मार्केटांतल्यो खूबशो समस्या आसात, हाची कल्पना आसा. सुमार 50 लाखांचो खर्च करून पुराय मार्केटाचें नुतनीकरण जावंक शकता. पूण विक्रेते फक्त 10 रुपया दिसाक कर दितात. तातूंत वाड करपाकूय ते तयार नात. एसजीपीडीए 100 रुपया मागत आसली तरी लेगीत चर्चेंतल्यान वाट काडूं येता अशें मत एसजीपीडीए अध्यक्ष आनी वास्कोचे आमदार कृष्णा साळकार हांणी उक्तायलें.
किरकोळ नुस्त्या मार्केटांत आनी आशिकुशीच्या वाठारांनी खूबशे कडेन उदक सांचून उरता. हाचो त्रास मार्केटांतल्या नुस्तें विक्रेत्यां सयत गिरायकांक तशेंच आशिकुशीच्या रहिवाशांक जातालो. हाची दखल घेवन एसजीपीडीएचे अध्यक्ष कृष्णा साळकार हांणी दनपारां मार्केटाची पळोवणी केली. थंय गटारांच्या नितळसाणीचें काम हातांत घेतलां. ह्या वेळार साळकारान सांगलें, नुस्तें विक्रेत्यांनी सकयल बसपा बदला वयर बसपाची गरज आसा. एसजीपीडीए कडल्यान 50 लाख खर्च करून मार्केटाची दुरुस्ती जावंक शकता. पूण आमदार विजय सरदेसाय आनी आमदार दिगंबर कामत हांचे कडेन चर्चा करून हो प्रस्न सोडयतले अशें तांणी सांगलें.
सोपो कर वाडोवन दिल्यार पुराय मार्केटाचें नुतनीकरण करतले. बसपाच्यो सुवातो बऱ्यो करून दितले. जें कितें तुटलां, मोडलां तें सगलें दुरुस्त करून दितले. सद्या मार्केट वाठारांत उदक सांचून उरपाची समस्या उप्रासताली. ताका लागून नितळसाण मोहीम राबयतात. एसजीपीडीएच्या किरकोळ नुस्त्या मार्केटा कुशीचें गटार तुंबला. ताका लागून रस्त्या मेरेन उदक सांचून उरतालें. आतां नितळसाण केले उपरांत हो प्रस्न परतून येवचो ना.
ठोक नुस्त्या मार्केटांत खूबशे जाण किरकोळ नुस्त्याची विक्री करतात. हे खातीर किरकोळ नुस्त्या मार्केटांत गिरायकांचो उणाव आशिल्ल्याची कागाळ हाजीर आशिल्ल्या नुस्तें विक्रेत्यांनी केली. ह्या वेळार साळकार हांणी सांगलें, दर दिसा 10 रुपया सोपो कर एसजीपीडीएक मेळटा. तातूंतल्यान मार्केटाची दुरुस्ती वा आनी हेर कसलींय कामां करप शक्य जायना. विक्रेत्यांनी सोपो कर वाडोवन दिवपाक संमती दिवपाची गरज आसा. त्याच वेळार मार्केटाची दुरुस्ती आनी नुतनीकरण करप शक्य जातलें. नाजाल्यार मार्केटांतल्यान मेळपी महसुला परस चड खर्च करप शक्य जावचें ना अशेंय तांणी स्पश्ट केलें. मडगांव आनी फातोड्डेंच्या आमदारां सयत एकठांय बसका घेवन हो प्रस्न सोडोवपाचो यत्न करतले अशेंय तांणी सांगलें.
मार्केटांत बॉक्स घेवन बसल्यार कारवाय
एसजीपीडीएच्या ठोक नुस्त्या मार्केटांत कांय परंपरीक रापणकार, बोटकार विक्रेत्यांक किरकोळ नुस्त्यांची विक्री करपा खातीर हाचे आदींचे समितीन परवानगी दिल्या. तेप्रमाण कोलवें आनी बाणावलीचे परंपरीक किरकोळ विक्रेते नुस्त्याची विक्री करतात. पूण तांचे बरोबर आतां लमाणी लेगीत नुस्तें घेवन रस्त्यार विक्री करतात. ती सुवात पालिकेच्या अधिकारांत येता. तांचेर कारवाय करप एसजीपीडीएक शक्य ना. पूण मार्केटांत बॉक्स घेवन बसप्यांचेर कारवाय करतले अशें कृष्णा साळकार हांणी स्पश्ट केलें.
15 दिसांत सोपो खातीर ऑनलायन निविदा
सोपो कर एकठांय करपाचें काम कांय वर्सां हें एसजीपीडीएच्या कर्मचाऱ्यां वतीन जातालें. सद्या एक कंत्राटदार नेमून पयशे एकठांय करतात. फुडल्या 15 ते 20 दिसांत सोपो कंत्राटदार निविदेचें काम पुराय जातलें आनी निविदा ऑनलायन दिसतली. उपरांत ती सगल्यां खातीर उक्ती दवरतले. न्यायालया कडल्यान दोन म्हयन्यांचो वेळ मागून घेत सोपो प्रक्रिया पुराय करतात अशें एसजीपीडीएचे अध्यक्ष कृष्णा साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
