भांगरभूंय | प्रतिनिधी
म्हापशें येरादारी खात्याचे क्लार्क बायलेन घेतिल्ली लांच
पणजी: म्हापशें येरादारी खात्याची बायल क्लार्क निवृत्त जाले उपरांत सुमार 9 वर्सांनी आरोप निश्चीत करपाचो आदेश अतिरिक्त सत्र न्यायालयान दिला. हे बायलेन वाहनाचें हस्तांतरण करपा खातीर 300 रुपयांची लांच घेतिल्ली. हें लांच प्रकरण सुमार 9 वर्सां प्रलंबीत उरिल्ले खातीर अजाप उक्तायतात.
म्हापशें येरादारी खात्याच्या क्लार्क बायलेक वाहन हस्तांतरण करपा खातीर 300 रुपयांची लांच घेतना दक्षता खात्याच्या भ्रश्टाचार विरोधी पंगडान 15 सप्टेंबर 2014 दिसा रंगेहात धरिल्ली. ह्या प्रकरणांत संबंदीत क्लार्काच्या आवाजाचो नमुनो अहवाल सकारात्मक आयिल्ल्याचें निरिक्षण नोंद करून म्हापशेंच्या अतिरिक्त सत्र न्यायालयाच्यो न्यायाधीश शर्मिला पाटील हांणी आरोप निश्चीत करपाचो आदेश जारी केला. सुमार 9 वर्सां उपरांत तशेंच ही बायल निवृत्त जाले उपरांत आरोप निश्चीत करपाचो आदेश जारी जाला.
ह्या प्रकरणांत हणजूणेंचो अंकीत साळगांवकारान दक्षता खात्याच्या भ्रश्टाचार विरोधी पंगडा कडेन 15 सप्टेंबर 2014 दिसा कागाळ दाखल केल्ली. ते प्रमाण कागाळदारान 5 ऑगस्ट 2014 दिसा 80 हजार रुपया दिवन मारुती जिप्सी जीप विकती घेतिल्ली. उपरांत संबंदीत जीप विकपा खातीर ताणें ओएलएक्साचेर जायरात दिल्ली. उपरांत ती जीप 82 हजार रुपयांक विकली. ती जीप नव्या धनयाच्या नांवार करपाची आशिल्ली. कागाळदारान 5 सप्टेंबर 2014 दिसा हरकत ना दाखलो मेळोवपा खातीर म्हापशेंच्या सहाय्यक येरादारी संचालक कचेरेंत अर्ज केल्लो.
त्या वेळार कागाळदारान हरकत ना दाखलो बेगीन दिवपाची विनंती बायल क्लार्का कडेन केली. ते बायलेन कागाळदाराक हरकत ना दाखलो बेगीन मेळोवपा खातीर 500 रुपया लागतले अशें सांगलें. अशें आसतना कागाळदारान 9 सप्टेंबर 2014 दिसा एका पाकिटांत 150 रुपया घालून दिले. ते प्रमाण ते बायलेन कागाळदाराक हरकत ना दाखलो कचेरेचे भायर आशिल्ल्या एजंटा कडल्यान घेवपाची सुचोवणी केली. उपरांत ते बायलेन कागाळदारा कडल्यान आनीक 350 रुपया मागले. तशेंच आपल्याक आनीक गाडयांचें हस्तांतरण करपाचें आसा अशें सांगून सूट दिवपाची मागणी केली. ते प्रमाण ते बायलेन 300 रुपया दिवचे पडटले अशें सांगून ताका परतून धाडलो.
उपरांत 10 सप्टेंबर 2014 दिसा कागाळदार परतून येरादारी कचेरेंत गेलो. ह्या वेळार ताणें इश्टाक थंय जावपी संभाशणाचें व्हिडियो चित्रण करपाची सुचोवणी केली. ते प्रमाण कागाळदार कचेरेंत गेलो तेन्ना ते बायल क्लार्कान ताचे कडल्यान 200 रुपया घेतले उपरांत ताका एजंटा कडल्यान हरकत ना दाखलो घेवपाची सुचोवणी केली. ते प्रमाण त्याच दिसा सांजवेळा त्या एजंटान कागाळदाराक निमाणें हरकत ना दाखलो दिलो. ह्या सगल्या प्रकाराचें कागाळदारान इश्टाचे मजतीन चित्रण केल्लें.
मजगतीं, कागाळदारान आनीक एका दुचाकीचें हस्तांतरण करपा खातीर म्हापशेंच्या सहाय्यक येरादारी संचालक कचेरेंत अर्ज केलो. ह्य वेळार ते बायलेन ताचे कडेन 400 रुपयांची लांच मागली. हाची दखल घेवन उपरांत कागाळदारान दक्षता खात्याच्या भ्रश्टाचार विरोधी पंगडा कडेन (एसीबी) 15 सप्टेंबर 2014 दिसा वयलें चित्रण सादर करून रितसर कागाळ दाखल केली. हाची दखल घेवन एसीबीन संबंदीत बायल क्लार्का आड भ्रश्टाचार प्रतिबंधक कायद्याच्या विवीध कलमा खाला गुन्यांव दाखल करून सांपळो रचलो.
थारिल्ल्या प्रमाण कागाळदारान वाटाघाटी करून ते बायलेक 300 रुपयांची लांच दिली. ह्याच वेळार एसीबीच्या पंगडान ते बायल क्लार्काक लांच स्विकारतना रंगेहात धरलो. उपरांत एसीबीन संबंदीत क्लार्काच्या आवाजाचो नमुनो एकठांय करून चंदिगड हांगासरल्या न्यायवैजक प्रयोगशाळेंत धाडून दिलो. हे विशींचो अहवाल सकारात्मक आयिल्ल्याचें निरिक्षण नोंद करून न्यायालयान बायल क्लार्का आड आरोप निश्चीत करपाचो आदेश जारी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
