भांगरभूंय | प्रतिनिधी
मुख्यमंत्री: भांगर 5 लाख, रुपें 3 लाख, कांशें 1 लाख जैतिवंतांक जाहीर
विशेश ऑलिंपिकांतल्या खेळगड्यांचो भोवमान
पणजी: बर्लीन (जर्मनी) हांगा जाल्ल्या विशेश भुरग्यांचे ऑलिंपीक सर्तींत भांगरा पदक जैतिवंत भुरग्यांक पांच लाख रुपया आनी सरकारी नोकरी, रुप्यां पदक जैतिवंतांक तीन लाख जाल्यार कांश्या पदक जैतिवंतांक एक लाख रुपया दितले अशी घोशणा मुख्यमंत्री डॉ. प्रमोद सावत हांणी काल (बुधवारा) केली.
विशेश भुरग्यांच्या ऑलिंपीक सर्तींत पदक जैतिवंत भुरग्यांच्या भोवमान सुवाळ्यांत मुखेल सोयरे ह्या नात्यान ते उलयताले. ह्या वेळार तांचे सयत समाज कल्याण मंत्री सुभाष फळदेसाय, सचीव सुभाष चंद्रा, दिव्यांग आयोगाचे आयुक्त गुरुप्रसाद पावसकार, विशेश ऑलिंपिकाचे संचालक व्हिक्टर वाझ, संजय स्कुलाचे अध्यक्ष सिद्धार्थ कुंकळयेंकार बी मानेस्त हाजीर आशिल्ले.
गोंयांतल्या विशेश भुरग्यांनी ऑलिंपीक सर्तींत येस मेळोवपा खातीर सुमारा भायर कश्ट घेतिल्ले. ताचे तांकां फळ मेळ्ळें. तांच्या येसांत तांचे पालक, शिक्षक आनी प्रशिक्षकांचो मोटो वांटो आसा. ऑलिंपीकांत पदकां मेळोवन ह्या विद्यार्थ्यांनी गोंयचें नांव संवसारभर गाजयलें. ताका लागून खेळां खात्या वतीन हेर पदक जैतिवंतांक ज्या प्रकारचे पुरस्कार दितात, तशेच पुरस्कार विशेश भुरग्यांकूय दिवपाचाे निर्णय राज्य सरकारान घेतला. फुडल्या दोन म्हयन्यांत ह्या भुरग्यांक ह्या पुरस्कारांचें वितरण करतले अशें मुख्यमंत्री डॉ. प्रमोद सावंत हांणी म्हणलें.
समाज कल्याण मंत्री सुभाष फळदेसाय हांणी पर्पल फेस्ता प्रमाणूच ऑलिंपीक सर्तींतूय विशेश भुरग्यांक घसघशीत येस मेळचें हे खातीर घेतिल्ले यत्न तोखणाय करपा सारके आसात अशें सांगून मुख्यमंत्र्यांनी मंत्री फळदेसाय हांची तोखणाय केली.
सरकारा कडल्यान विशेश भुरग्यांक प्रोत्साहन
गोंय सरकारा कडल्यान विशेश भुरग्यांक प्रोत्साहन दिवपा खातीर सेगीत विवीध कार्यावळींचें आयोजन करतात. कसलोच आडोवेडो घेनासतना मुख्यमंत्री डॉ. प्रमोद सावंत हे खातीर लागपी सगली अर्थीक मजत दितात. ताका लागूनच विशेश भुरगीं विवीध मळार दर्जेदार कामगिरी करीत आसात अशें समाज कल्याण मंत्री सुभाष फळदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
