भांगरभूंय | प्रतिनिधी
फोंडकुलां ताकतिकेन पुरोवचीं; थळाव्यांची मागणी
फोंडें: उसगांवां सर्कला कुशीक रस्त्यार पडिल्लीं फोंडकुलां सद्या वाहन चालक तशेंच चलून वचप्यां खातीर तकलीफोड थारल्यात. फाटल्या कितल्यशाच वर्सां सावन उसगांवचें सोबितीकरण करपाची घोशणा करतात. तेच प्रमाण दरवर्सा पावसाच्या दिसांनी लोकांक फोंडकुलांतल्यान रस्तो हुपून मुखार वचपाची वेळ उसगांव वाठारांतल्या लोकांचेर येत आसा. आस्वासनां दिवपा बदला रस्त्याची दुरुस्ती करून थाकाय दिवपाची मागणी उसगांव वाठारांतले लोक करीत आसात.
उसगांवचें सोबितीकरण करपाची आस्वासनां फाटल्या कितल्याशाच वर्सां सावन दरेक कार्यावळींत थळाव्या लोकांक मेळत आसात. पूण दर वर्सा फोंडकुलांनी भरिल्ल्या रस्त्याची दुरुस्ती वेवस्थीनपणान जायत नाशिल्ल्यान लोकांनी तिडक उक्तायल्या. सर्कला कुशीक पडिल्ल्या फोंडकुलांत पावसाचें उदक भरून उरत आशिल्ल्यान वाहन चालकांक ताचो अदमास येना. ताका लागून रातच्या वेळार दुचाकी घेवन रस्त्यार पडपाचे प्रकार वाडत आसात.
उसगांव पंचायती वतीन बांदकाम खात्याक पावसा पयलीं फोंडकुलां फातर घालून दुरुस्त करपाचे मागणी कडेन अभियंत्यांनी आडनदर केल्ल्याचें स्पश्टपणान दिसून येता. सरपंच नरेंद्र गांवकार हांणी दिल्ले म्हायती प्रमाण पावसा पयलीं पंचायत वाठारांतल्या रस्त्याची दुरुस्ती करपा खातीर बांदकाम खात्या कडेन फाटपुरवण केल्ल्याचें सांगलें.
उसगांव सर्कल ते गांजे मेरेनच्या रस्त्यार लेगीत खूबशा सुवातांनी उदकान भरिल्लीं फोंडकुलां तकली वयर काडूंक लागल्यात. ताका लागून रातच्या वेळार दुचाकी चालक रस्त्यार पडपाचे प्रकार वाडल्यात. फाटल्या कितल्याशाच वर्सां सावन ह्या रस्त्या वयलीं फोंडकुलां वेवस्थीत पुरयत नाशिल्ल्यान पावसाच्या दिसांनी थळाव्यांक तशेंच वाहन चालकांची तकलीफोड वाडत आसा. फातर घालून तरी फोंडकुलां पुरोवचीं अशी मागणी वाहन चालक करीत आसात.
फाटल्या कितल्याशाच वर्सां सावन उसगांवचें सोबितीकरण करपाची घोशणा करतात. ते खातीर कांय वर्सां पयलीं बुन्याद घालपाची कार्यावळ लेगीत आयोजीत केल्ली. पूण फाटल्या कांय वर्सा सावन सोबितीकरण करपाची आस्वासनां दितात. आस्वासनांची पुर्तताय जायत नाशिल्ल्यान फोंडकुलांचें सोबितीकरण करपाची मागणी थळावे लोक करूंक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
