भांगरभूंय | प्रतिनिधी
संवसारांतलो सगल्यांत लोकप्रीय अभिनेतो, विनोदाचो बादशाह चार्ली चॅप्लीन हांची आयज जयंती. पयल्या म्हाझुजाच्या पयलींच्या काळांत मुकपटांत अभिनय करून आपले आगळे वेगळे शैलीन प्रेक्षकांक हांसोवपी चार्ली चॅप्लीन हांचो जल्म 16 एप्रील 1889 दिसा लंडनांत जालो. चार्ली चॅप्लीन हांणी आपल्या अभिनयाची सुरवात शाळेंत आसतना सावनूच केली. पिरायेच्या णवव्या वर्सा शाळेंतल्या नाच पंगडांत तांची निवड जाली. ह्या पंगडा वरवीं जावपी कार्यावळींनी ते अभिनाय आनी नाच करताले. तांची आवय मानसीक दुयेंसान पिडेस्त आशिल्ल्यान पिरायेच्या तेराव्या वर्साच तांकां शाळा सोडची पडली. घर चलोवपा खातीर ते ल्हान व्हड कामां करूंक लागले. घरची परिस्थिती हालाखिची आसून लेगीत तांणी आपलो आत्मविस्वास उणो जावंक दिलो ना. परिस्थितीन उरफाटें तांकां खंभीर केलें.
त्या वेळा वेले परिस्थिती विशीं चार्ली चॅप्लीन आपल्या आत्मचरित्रांत म्हणटात, म्हाका ती परिस्थिती चड काळ सोंसची पडली ना. आती ते परिस्थितींतल्यान सेगीत वाटचाल करीत आशिल्लों, आनी हांव ल्हान आशिल्ल्यान हो त्रास हांव सहजतायेन विसरून वतालों. तांचो आत्मविस्वास कणखर आशिल्लो. व्हड अभिनेतो जावपाची मोख पुराय करपा खातीर ते नाटक कंपनीं कडेन नेमान संपर्क सादताले. तांच्या कश्टाक फळ मेळ्ळें. तांकां खूबशा नाटकांनी भुमिका मेळूंक लागल्यो. मुखार तांकां व्हड पड्ड्यार लेगीत संद मेळत गेली. पड्ड्या वेले तांचें आगळें वेगळें रूप प्रेक्षकांक खूब आवडलें. पड्ड्यार तांची एन्ट्री जाली की प्रेक्षकांक आपलो हांसो आडावंक येनाशिल्लो. एक तायट कोट, ल्हानशी हॅट, व्हड शूज आनी चेऱ्याचेर ल्हानशी मिशी अशें तांचें पड्ड्या वेलें रूप प्रेक्षकांक खूब आवडलें, आनी हेंच तांचे वेगळें रुप तांची वळख जाली.
हे व्यक्तीरेखे विशीं ते आपल्या आत्मचरित्रांत म्हणटात, ज्या खिणाक हांवें तो भेस केलो, मेकअप केलो, त्याच खिणाक हांव ती व्यक्तीरेखा अणभवूंक लागलों. हांव ताका वळखतालों आनी रंगमाचयेर आस मेरेन तो म्हज्यांत रिगिल्लो आसतालो. चार्ली चॅप्लीन हांणी जिणेचे सार पड्ड्यार खूबशे तरेन जगा मुखार मांडले. फकांडां करपा खातीर दुख्ख हें कारण आसता. फकांडां करप म्हणल्यार प्रतिकार करप सैमाचे शक्ती मुखार लेगीत हांसत रावंक जाय. संकश्टाक हांसत हांसत सामकार वचूंक जाय, नाजाल्यार मानसीक रितीन खचून वचपाची शक्यताय आसता अशें ते म्हणटाले. म्हणूनच तांच्या जिणेचो लागींचो सिनेमा ‘द कीड’ हाचें ओपनिंग टायटल आशिल्लें ‘अ पिक्चर विथ अ स्मायल अॅण्ड परहॅप्स अ टियर’ स्वताचें दुख्ख विसरून आवयचें सपन साकार करपा खातीर तांणी पड्ड्यार पिश्याची भुमिका करून संवसारभरांतल्या प्रेक्षकांच्या मनार राज्य केलें.
चार्ली चॅप्लीन हांच्या अभिनयाचें वैशिश्ट्य म्हणल्यार ते प्रेक्षकांक इतले हांसयताले की प्रेक्षक पोटदुख मेरेन हांसताले, आनी दुसऱ्याच खिणाक दोळ्यांत उदक हाडून रडयताले. आत्मविस्वासाच्या बळग्यार तांणी खूबश्यो आयडिया करून पड्ड्यार साकारल्यो आनी गाजयल्यो. संवसारीक पटलार म्हानायक म्हूण ते जीणभर वावुरले. पयल्या म्हाझुजाच्या काळांतूय तांणी लोकांक हांसोवपाचें कार्य केलें.
25 वर्सां उपरांत संवसारीक मंदी आनी हिटलराच्या काळांतूय तांणी प्रेक्षकांक हांसोवपाचें कार्य थांबयलें ना. लोकांक ज्या काळांत मनरिजवणेची आनी हांसपाची गरज आशिल्ली त्या काळांत चार्ली चॅप्लीन हांणी लोकां खातीर बऱ्यो भुमिका वठयल्यो. 25 डिसेंबर 1977 दिसा प्रेक्षकांक पोटदुख सर हांसोवपी हो व्हड अभिनेतो काळाच्या पड्ड्या आड गेलो. चार्ली चॅप्लीन हांकां जयंती दिसा आर्गां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
