भांगरभूंय | प्रतिनिधी
संवसारांतल्या वाडट्या कार्बन उत्सर्जना आड झुजपाचें एक शस्त्र म्हणून सौर पॅनलां कडेन पळयतात. पूण ते पिड्ड्यार जाले उपरांत धोक्याचे थारूंक शकतात,असो निश्कर्श तज्ञांनी काडला. पॅनलांक लागून पर्यावरणाचे संकश्ट येवं येता. खरें म्हणल्यार सौर पॅनलाचें आयुश्य 25 वर्सां. तज्ञांच्या मतान, संवसारांत कितल्याशाच वर्सां सावन सौर पॅनल वापरतात. तांची संख्या सुमार 2.5 अब्ज आसा. आतां ह्या सौर पॅनलाचे आयुश्य सोंपपाचो काळ लागीं पावला. म्हणल्यार ते बेगीन पाड जावन ताचो कोयर जावंक शकता..
फ्रांन्सात ह्याच म्हयन्यांत सौर पॅनल रिसायकल कारखानो सुरू करतले, पूण, फकत एकूच कारखानो संवसारांतले प्रस्न सोडोवंक शकना. 2050 वर्सा मेरेन 200 दशलक्ष टन सौर पॅनल कोयर एकठांय जातलो, अशें तज्ञांचें मत. कांय द्रव पदार्थांचो उपेग सौर पॅनलांत उश्णताय हस्तांतरित करपाक करतात. हे द्रव पदार्थ केन्ना- केन्ना गळटात, जाका लागून पर्यावरणाक आनी मनशाच्या जिवाक धोको निर्माण जाता. जायतीं दुयेंस जावंक शकतात. तशेंच जमनीचो दर्जो उणो जावंक शकता.
फ्रेंच सौर रिसायकल कंपनी ROSI सौर पॅनलांत वापरिल्लो दरेक घटक काडून रिसायकल करता. खरें म्हणल्यार पॅनलांतली अॅल्युमिनियम फ्रेम, कंवची, रुपें आनी तांबें काडून उडोवप आनी मागीर रिसायकल करुन परत वापरप सगळ्यांत कठीण. कंवचेचे टायल्स करूं येतात वा सँड ब्लास्टिंगांत वापरूं येता. तशेंच हेर पदार्थां वांगडा भरसून डांबर तयार करपाक वापरूं येता. पूण ताचो उपेग नवे सौर पॅनल तयार करपांत जायना.
आंतरराश्ट्रीय नवीकरणीय उर्जा एजन्सीच्या (IREA) म्हणण्या प्रमाण, 2040 वर्सा मेरेन वर्सुकी सौर पॅनल कोयर 10 दशलक्ष टना मेरेन पावतलो. तशेंच 2050 वर्सा मेरेन सौर पॅनल कोयर वर्सुकी 20 दशलक्ष टन जातलो. भारत आनी इंडोनेशियात 2040 वर्सा मेरेन हांतूत म्हत्वाची वाड जातली. भारताच्या राश्ट्रीय सौर उर्जा महासंघाच्या (NSEFI) अहवाला प्रमाण भारतांत 2030 वर्सा मेरेन 34,600 टन सौर पॅनल कोयर एकठांय जातले. फुडल्या 10- 20 वर्सांत सौर पॅनल रिसायकलिंग वेवसाय वाडटलो. आयआरईएच्या म्हणण्या प्रमाण, 2050 वर्सा मेरेन सौर रिसायकलिंग बाजारपेठ वर्सुकी 8.8 अब्ज डॉलर जातली.
कार्बन उत्सर्जनाक लागून जागतीक उश्णताय वाडटा. संवसारभरांतल्यान दर वर्सा 4000 दशलक्ष टन कार्बन डायऑक्सायड (कार्बन उत्सर्जन) भायर सरता. ह्या वायु प्रदुशणाक लागून उश्णताय सतत वाडत आसा. संवसारीक पांवड्यार कोळसो, कच्चे तेल आनी सैमीक वायू हांचो उर्जे खातीर चड वापर करतात. संवसारांतल्या वट्ट कार्बन उत्सर्जनांत जीवाश्म इंधनांचो सगळ्यांत चड वांटो आसता. उत्सर्जन उणें करपाक कोळशाचेर आशिल्ले आमचें अवलंबन उणें करचें पडटले. ते खातीर आमी सौर उर्जा आपणावपाक लागल्यात.
सद्याच्या प्रमाणांत हरितगृह वायूचें उत्सर्जन चालू उरलें जाल्यार 2050 वर्सा मेरेन धर्तरेचें तापमान दोन अंश वाडटलें, अशें तज्ञ म्हणटात. अशें जालें जाल्यार कांय कडेन खर दुकळ आनी कांय कडेन विध्वंसक हुंवार येतलो. हिमखंड वितळटले, दर्याची पातळी वाडटली. हाका लागून दर्या देगेर आशिल्लीं जायतीं शारां बुडून नश्ट जातलीं.
2050 वर्सा मेरेन धर्तरेचें तापमान 1.5 ते 2 अंश वाडलें जाल्यार फुडल्यो गजाली घडटल्यो. 10 वर्सांत आर्क्टिक म्हासागराचो पुराय बर्फ वितळटलो. मालदीव सारको देश पुराय बुडपाचे वाटेर आसतलो. मुंबय, चेन्नय, विशाखापट्टणम सारकिल्लीं 12 शारां 3 फूट उदकांत बुडटलीं. हुंवाराचे प्रवाह 2000 चे तुळेंत 6.7 पटींनी चड आसतले. संवसारांतल्या 14% लोकांक उश्णतायेच्या ल्हारांक तोंड दिवचें पडटलें. धव्या वांशेलां सयत 4% जनावरां नश्ट जातलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
