भांगरभूंय | प्रतिनिधी
म्हापशें: हांगासरल्या एट्रिया ह्या वेवसायीक स माळ्याच्या इमारतीचे लिफ्टींत राजीवा ही 49 वर्सां पिरायेची बायल वरभर आडकून उरली. वीज पुरवण खंडीत जाल्ल्यान ही लिफ्ट बंद पडिल्ली. म्हापशें उजो पालोवपी दळाच्या जवानांनी हे बायलेची सुखरूप सुटका केली.
ही घडणूक सोमारा सांजवेळा 3.30 वरांच्या सुमाराक घडली. ही बायल इमारतींत नितळसाणीचें काम करताली. ती लिफ्टींतल्यान सकयल देंवताली. त्याच वेळार अचकीत वीज पुरवण खंडीत जाली आनी लिफ्ट बंद पडली आनी ही बायल दुसऱ्या आनी पयल्या माळ्याचे मदेकांत लिफ्टींत आडकून उरली. हाका लागून ती वरभर लिफ्टींतूच उरली.
हो प्रकार नदरेक येतकूच इमारतींतल्या कांय लोकांनी म्हापशेंच्या उजो पालोवपी दळाक आपयलें. तशेंच दळाचे जवान यो मेरेन लिफ्टींत आडकल्ले बायलेक धीर दिवपाचो यत्न केलो. दळाच्या जवानांनी घडणूक थळार धांव घेवन तिका लिफ्टीचे भायर काडीत तिची सुखरूप सुटका केली.
वीज पुरवण खंडीत जाले उपरांत लिफ्ट चालू उरपा खातीर पर्यायी इनव्हर्टर वा जनरेटराची वेवस्था ना. ताका लागून अशे परिस्थिती वेळार लिफ्ट काम करिना. दळाच्या जवानांनी इमारतीच्या टेर्रासार वचून थंयच्यान लिफ्ट घुंवडायली आनी तिका पयल्या माळ्यार घेतली, आनी आडकल्ले ते बायलेक भायर काडली.
दळाचे अधिकारी अशोक परब, सुरज शेटगांवकार, स्वप्नेश कळंगूटकार, संजय फडते, दिलीप सावंत, विष्णू केसरकार, सखाराम गांवकार हांणी हे बायलेक सुखरूप भायर काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
