भांगरभूंय | प्रतिनिधी
भांगरभूंय । प्रतिनिधी
पोरणे गोंयः सेव म्हादय सेव्ह गोवा वतीन शुक्राराक तिसवाडी तालुक्यांत दुचाकी रॅली काडून म्हादय अभयारण्य वाग राखीव वाठार म्हणून जाहीर करचो हे खातीर जाग्रुती केली. खोर्ली पंचायत कार्यालया कडेन सरपंच बाप्तिस परेरान बावटो दाखोवन हे रॅलीक सुरवात करून दिली. ह्या वेळार राजन घाटे, मारयाण फॅर्रांव आनी परपेच्युवा फॅर्रांव हाजीर आशिल्ली.
रॅली तिसवाडी तालुक्यांतल्या दरेका पंचायत वाठारांत व्हेली आनी थंयच्या सरपंचांक म्हादय वाग राखीव वाठार म्हणून जाहीर करचो अशी मागणी करपी थाराव ग्रामसभेंत पास करपाची मागणी करपी निवेदना तांकां भेटयलीं. कर्नाटकाक म्हादयचें उदक कशेंच घुंवडावपाक दिवपाक जायना. म्हादय वाठार वाग राखीव वाठार म्हणून जाहीर केल्यार कर्नाटकांक आनी केंद्र सरकाराक उदक कशेंच घुंवडावपाक मेळचें ना अशें सेव्ह म्हादय सेव्ह गोवाच्या शिश्टमंडळान सरपंचांक सांगलें. ह्या शिश्टमंडळान करमळीचो सरपंच कुस्टा सालेलकार, आजोशीं- मंडूरचो सरपंच प्रशांत नायक, गोवा वेल्हाचो सरपंच इमिला कयादो, शिरीदांवचो सरपंच सुवर्णा कुंकळ्ळकार, आनी कुडकाचो उपसरपंच विनेश आडपयकार हांची भेट घेवंन ग्रामसभेंत थाराव पास करपाची विनवणी तांकां केली. नेवरा पंचायतीच्या पंच वांगड्यांक तांणी निवेदन भेटयलें. शेनवारांक शिश्टमंडळ तिसवाडी तालुक्यांतल्या पोरणे गोंय, चिंबल, मेरशी, सान्ताक्रुज आनी ताळगांवच्या पंचायतीच्या सरपंचाक मेळून निवेदन भेटयतलें. पणजे म्हानगरपालिकेक भेट दिवंन शिश्टमंडळ निवेदन भेटयतलें.
म्हादय वाठार वाग राखीव वाठार म्हणून जाहीर करप व्हो म्हादय न्हंय वाटावपाचो शॉर्ट कट आसा. कोर्ट- कचेरी सारको लाँग कट वापरपाची गरज ना. सरकारान वाग राखीव वाठार म्हणून जाहीर केल्यार सगले प्रश्न सुटावे जातले अशें सेव्ह म्हादय सेव्ह गोवाच्या मारयाण फॅर्रांव हाणे सांगलें
सगल्या आमदारांक आमी निवेदन भेटोवन गोंय विधानसभेच्या अधिवेशनांत म्हादय वाठार वाग राखीव वाठार म्हणून जाहीर करपाची मागणी करपी थाराव पास करपाक सांगतले अशें राजन घाटे हाणे सांगलें. गोंयच्या दोनूय जिल्ह्यांत जाग्रुती केल्या उपरांत आमची मोहीम आमी थांबयतले अशी म्हायती ताणे दिली.
शिश्टमंडळान शुक्राराक भेट घेतल्ल्या सगल्या सरपंचांनी म्हादय वाग राखीव वाठार म्हणून जाहीर करचो ही मागणी करपी थाराव पास करपा खातीर जाय त्यो गजाली करपाचें उतर सेव्ह म्हादय शिश्टमंडळा दिलां अशें परपेच्युवा फॅर्रांवान सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
