भांगरभूंय | प्रतिनिधी
11 नवे दुयेंती सांपडले; वट्ट सक्रीय दुयेंती 48
पणजी: वाडटे गरमेक लागून भलायकेचेर परिणाम जाणवूंक लागला. ताका लागून गोंयांत कफ थंडी सारकीं लक्षणां वाडल्यांत. मंगळार आनी बुधवार ह्या 24 वरांत 11 नवे कोरोना सक्रीय दुयेंती सांपडले. वट्ट कोरोना सक्रीय दुयेंतींची संख्या 48 चेर पावल्या. ताका लागून परतून कोरोनाची भिरांत उप्रासूंक लागल्या.
फाटल्या दोन वर्सां शिगमोत्सवा उपरांत मार्च, एप्रीलांत कोरोनाच्या सक्रीय दुयेंतींची संख्या वाडत आशिल्ली. जरी आतां कोरोना नियंत्रणांत आयिल्लो आसलो तरी सद्या वातावरणांत जावपी बदलाक लागून लोकांक थंडी, जोराचीं लक्षणां चड दिसून आयल्यांत. ते खातीर खूबशे लोक तपासणी खातीर वतात. ताका लागून कोरोनाचे सक्रीय दुयेंतींचे संख्येंत वाड जायत आसा. कोरोना अजुनूय पुरायपणान गेल्लो ना.
भलायकी खात्याचे अधिकारी डॉ. सुर्यवंशी हांचे कडेन संपर्क सादलो तेन्ना तांणी भियेवपाची कसलीच गरज नाशिल्ल्याचें स्पश्ट केलें. सद्या व्हायरल थंडी सुरू आशिल्ल्यान कोरोनाच्यो चांचण्यो वाडल्यात. ताका लागून कांय प्रमाणांत कोरोना सक्रीय दुयेंतींची संख्या लेगीत वाडत आसा. तरी लेगीत भलायकी खातें सतर्क आसा. फाटलीं दोन वर्सां जे प्रमाण मार्चांत, एप्रीलांत कोरोना सक्रीय दुयेंती वाडिल्ले, तशें ह्या वेळार दुयेंती वाडपाची भिरांत ना. भलायकी खातें सतर्क आसून व्हड प्रमाणांत वासिनीकरण जालां. परतून ही संख्या देंवतली अशें डॉ. सुर्यवंशी हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
