भांगरभूंय | प्रतिनिधी
हवामानांतल्या बदलाक लागून जोर, थंडी आनी खोंकली येवपाचें प्रमाण वाडलां. हांचेर अॅण्टीबायोटीक वखदां दिवप टाळचें अशें भारतीय वैजकी संघटणेन दोतोरांक सांगलां. हे संबंदीं आयएमएन सविस्तर पत्र जारी केलां.
खोंकली, मळमळ, ओंकारी, गळो दुखप, जोर, आंग दुखप अशीं लक्षणां दिसपी दुयेंतींचो आकडो अकस्मात वाडलां. हो संसर्ग पांच ते सात दीस टिकता. तीन दिसांनी जोर चल्लो, पूण खोंकली तीन सप्तकां मेरेन टिकूंक शकता. एनसीडीसीचे म्हायती प्रमाण, चडशे दुयेंती एच3एन2 इन्फ्लूएंझा व्हायरसाचे आसात. ऑक्टोबर ते फेब्रुवारी ह्या काळांत इन्फ्लूएंझा आनी हेर व्हायरसांक लागून थंडी वा खोंकली येवप चड प्रमाणांत दिसून येता. 50 वर्सां वयर आनी 15 वर्सां सकयल्या लोकां मदीं हो दुयेंस चड प्रमाणांत दिसून येता. लोकांक जोरा वांगडा स्वासाचे संसर्ग जातात. तातूंत वायू प्रदुशण हो एक घटक.
दुयेंतींनी कसलीं वखदां घेवचीं?
दुयेंतींचेर फकत लक्षणां प्रमाण उपचार करात, अॅण्टीबायोटीक वखदांची गरज ना. पूण सध्या लोक अॅझिथ्रोमायसिन आनी अमोक्सिक्लॅव्ह आदी अॅण्टीबायोटीक वखदां घेवपाक लागल्यात, बरें दिसता तेन्ना वखदां बंद करतात. हें थांबवप गरजेंचें. अॅण्टीबायोटीक वखदांचो मारो जाल्ल्यान प्रत्यक्षांत मुखार अॅण्टीबायोटीक वखदांचो वापर जातलो तेन्ना प्रतिकारशक्ती खातीर तीं काम करचीं नात.
कांय वेळार हेर जायत्या अॅण्टीबायोटीक वखदांचो गैरवापर जाता. अॅण्टीबायोटीक वखदां दोतोर बरोवन दितात. अमोक्सिसिलिन, नॉरफ्लॉक्सासिन, सिप्रोफ्लॉक्सासिन, ऑफ्लोक्सासिन, लेव्होफ्लोक्सासिन ह्या अॅण्टीबायोटीक वखदांचो गैरवापर जाता, अशें दिसून आयलां.
कोविडा वेळार अजिथ्रोमाइसिन आनी आयव्हरमेक्टिन हांचो व्हड प्रमाणांत वापर जाला. अॅण्टीबायोटीक वखदां दिवचे पयलीं संसर्ग बॅक्टेरियाचो आसा काय ना हें तपासप गरजेचें आसा. गर्दी आशिल्ली सुवात टाळचीं, हात नितळसाण करपाची पद्दत आपणावची, मास्क घालचो आनी संसर्ग जावचो न्हय म्हूण लस घेवची, असो उलो वयले संघटनेन मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
