भांगरभूंय | प्रतिनिधी
म्हापशें: तार बस्तोड्यां राष्ट्रीय म्हामार्गार मोटारीन स्कुटरीक फाटल्यान धपको दिलो. ह्या धपक्या उपरांत फ्रेडा फर्नांडीस (रा. थिवी) ही स्कुटर चलाेवपी बायल उड्डाण पुला वयल्यान सर्व्हीस रोडार पडून गंभीर जखमी जाली.
हो अपघात बिरेस्तारा सांजवेळा 6.15 वरांच्या सुमाराक घडलो. दोनूय वाहनां गिरी सावन करासवाड्याचे दिशेन राष्ट्रीय म्हामार्गा वयल्यान वतालीं. जीए 03 एएन 4815 क्रमांकाचे स्कुटरीन जखमी फर्नांडीस वताली. जाल्यार जीए 07 के 8845 ही बालेनो मोटार घेवन चालक मायरा रिबेरो ही बायल वताली.
दोनूय वाहनां तार बस्तोडें उड्डाण पुलार पावतकूच मोटारीन स्कुटरीक फाटल्यान धपको दिलो. ह्या धपक्याक लागून स्कुटर चलोवपी बायल उड्डाण पुला वयल्यान सकयल सर्व्हीस रोडार पडली. तिच्या पांयाक आनी कमराक गंभीर दुखापत जाल्या.
पुलिसांनी रॉबर्ट गाडयेंतल्यान जखमीक जिल्हो हॉस्पिटलांत दाखल केलाे. थंय सावन तिका फुडल्या उपचारा खातीर गोमॅकाँत हालयल्या.
अपघाताचो पंचनामो म्हापशेंचे पुलीस हवालदार शिवाजी शेटकार हांणी केलो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
