भांगरभूंय | प्रतिनिधी
म्हापशें: बोडगिणी म्हापश्यां बोशान इमारती मुखार म्हाल व्हरपी रिक्षान दुचाकीक धपको दिलो. ह्या अपघातांत गंभीर जखमी जाल्लो मंगेश शेटकार (62, रा. खडपावाडो, म्हापशें) ह्या जाण्ट्या दुचाकी चालकाक उपचारा वेळार मरण आयलें. मयत शेटकार हे लोकमान्य बँकेच्या म्हापशें फांट्याचे कर्मचारी आशिल्ले.
हो अपघात बुधवारा दनपारां 2.30 वरांच्या सुमाराक घडलो. मयत शेटकार हे आपल्या जीए 03 एएस 7948 ह्या स्कुटरी वयल्यान बोशान इमारतींतल्या लोकमान्य बँकेच्या फांट्यात वताले. इमारती कडेन वचपा खातीर स्कुटर वळयतकूच काणका सावन म्हापश्यां वचपी जीए 03 एएच 1910 क्रमांकाचे म्हाल व्हरपी रिक्षा टेम्पोन स्कुटरीक नेटाचो धपको दिलो.
ह्या अपघातांत मयत शेटकार हे गंभीर जखमी जाले. तांकां उपचारा खातीर म्हापशेंच्या जिल्हो हॉस्पिटलांत आनी उपरांत गोमॅकाँत दाखल केलो. थंय उपचार सुरू आसतना सांजवेळा तांकां मरण आयलें.
अपघाताचो पंचनामो म्हापशेंचे पुलीस उपनिरिक्षक विराज कोरगांवकार आनी हवालदार केशव नायक हांणी केलो. निश्काळजीपणान वाहन चलोवन सदोश मनीसवधाचो गुन्यांव दाखल केला आनी दुबावीत रिक्षा टेम्पो चालक धोंडीबा गणपत कोचकार (45, रा. तेऊळवाडा, चंदगड-महाराष्ट्र) हाका अटक केल्या. दुबावीत आरोपी वाहन चालक परवान्या बगर हें वाहन चलयतालो. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
