वैश्य समाज आंतरराष्ट्रीय वैश्य अ‍ॅप करतलो तयार

भांगरभूंय | प्रतिनिधी

गोरेगांव, मुंबय क्षेत्रीय विभाग प्रतिनिधींच्या संमेलनांत थाराव

म्हापशें: आंतरराष्ट्रीय वैश्य समाजाचे उदरगती खातीर तशेंच संवसारीक पांवड्यार वेपाऱ्यां मदीं उदरगत सादूंक मेळची हे खातीर आंतरराष्ट्रीय वैश्य वेपारी अ‍ॅप हें येता त्या शंबर दिसांत तयार करपाचो म्हत्वपूर्ण थाराव गोरेगांव, मुंबय हांगा गोरेगांव खेळां संकूल सभाघरांत आयोजीत केल्ल्या क्षेत्रीय विभाग प्रतिनिधींच्या संमेलनांत घेतलो. हे बसकेक आंतरराष्ट्रीय वैश्य महासंमेनाच्या गोंय विभागाचे प्रतिनिधी हाजीर आशिल्ले.

ह्या संमेलनांत दक्षीण क्षेत्रीय विभागांतले गोंय, महाराष्ट्र, छत्तीसगड, गुजरात, मध्य प्रदेश, मुंबय आनी राजस्थान ह्या मंडळांचे पदाधिकारी वांटेकार जाल्ले. राष्ट्रीय अध्यक्ष अशोक अग्रवाल हांचे हस्तुकीं संमेलनाचें दिवली पेटोवन उक्तावण जालें. ज्येश्ठ कार्यकारी अध्यक्ष सुरेंद्र गुप्ता, विपीन अग्रवाल, अनूप खंडेलवाल, महाराष्ट्र अध्यक्ष महेश गुप्ता, मुंबय अध्यक्ष डी. सी. गुप्ता, गोंय अध्यक्ष बाळकृष्ण शिरसाट, उपाध्यक्ष तुषार टोपले, महिला अध्यक्ष अ‍ॅड. सिध्दी पारोडकार, सचीव शमा टोपले, अमय शिसाट, राजस्थान अध्यक्ष एन. के. गुप्ता, महिला अध्यक्ष ज्योती खंडेलवाल, मध्य प्रदेश अध्यक्ष राहूल कोठारी, महिला अध्यक्ष संगीता पलोड, छत्तीसगड अध्यक्ष योगेश अग्रवाल हांची हाजेरी आशिल्ली.

ह्या वेळार दरेक राज्यान जिल्हो पांवड्यार समिती स्थापन करची, वर्साक दोन राज्य कार्यकारिणीच्यो बसका आनी एक राज्य पांवड्यार अधिवेशना घेवपा विशींची चर्चा जाली. दरेक राज्यांतल्या वैश्य समाजाच्यो समस्या समजून घेवन हे विशींचें पत्र केंद्रीय समितीक धाडचें, समाजाच्या कार्याची व्याप्ती वाडोवपा खातीर 101 प्रतिनिधींचें सल्लागार मंडळ स्थापन करचें, हातूंत उद्देजक, वेपारी, केंद्रीय मंत्री, आमदार, राज्य मंत्री, शिक्षण आनी वेवसायीक मळा वयल्या वांगड्यांचो आस्पाव आसचो.

आयएएस, आयपीएस, न्यायाधीश, सरकारी अधिकारी वर्गाचो सन्मान करचोा, वैश्य प्रतिनिधींनी शक्य जाल्यार दरेक राज्यांत भेटीगांठी करून समाजाप्रती आदर आनी संबंद वाडोवपा खातीर चर्चा करून निर्णय घेवचो. केंद्र आनी राज्य सरकाराच्यो येवजण्यो वैश्य समाजाच्या निमाण्या घटका मेरेन पावोवपा खातीर कार्यावळ आंखची अशें ह्या वेळार थारलें.

नव्या उद्देगांक प्रोत्साहन दिवपा खातीर धोरणात्मक नियोजन करून दरेक राज्यांत समाज विकास सादपाचो म्हत्वपूर्ण निर्णय जालो. मेक ईन इंडिया, स्टार्ट अप येवजणे खाला विकास करपा खातीर पावलां उबारतले अशें राष्ट्रीय अध्यक्ष अशोक अग्रवाल हांणी सांगलें.

ह्या संमेलनांत गोंयांतल्या आंतरराष्ट्रीय वैश्य महासंमेलनाच्या प्रवासाचो अहवाल गोंय अध्यक्ष बाळकृष्ण शिरसाट हांणी मांडलो. तशेंच गोंयांतल्या बायलांक हे मोहिमेंत वांटेकार करून घेवपा खातीर विवीध सर्ती, भलायकी तपासणी शिबीर, कायद्याचो सल्लो फुकट दिवपा खातीर उपक्रम राबयिल्ल्याची म्हायती महिला अध्यक्ष अ‍ॅड. सिद्धी पारोडकार हांणी दिली.