भांगरभूंय | प्रतिनिधी
अॅड. पॅट्रीक मोंतेरोचो आरोप; थळाव्या आमदारान दखल घेवपाची मागणी
कुंकळ्ळी: कुंकळ्ळी उद्देगीक वसणुकेंत कांय कारखान्यांनी उद्देगीक वसणुके भायर आशिल्ले कुंकळ्ळी सोसिएदाद द ऍग्रिकोलाचे सुवातेंत बेकायदो बांय खणल्या. कसलोच कायदेशीर सोपस्कार पुराय करिनासतना सुमार 20 x 20 मिटर व्यासाची बांय खणून, ताचे वरवीं स्वताच्या कारखान्यांक बेकायदो उदका पुरवण करतात, असो आरोप अॅड पॅट्रीक मोंतेरो हांणी कुंकळ्ळी उद्देगीक वसणुकेच्या शेजरा घेतिल्ले पत्रकार परिशदेंत उलयतना केलो.
ह्या वेळार तांचे सयत समाज कार्यकर्ते आवी देसाय, शंतनू देसाय, रामानंद देसाय आनी हेर नागरीक हाजीर आशिल्ले.
मुखार उलयतना अॅड. मोंतेरोन म्हणलें, हें बेकायदो बांदकाम सर्वे क्रमांक 164/4, 164/69,– 336/-,335/1 हातूंत आसा. आनी हांगा संबंदीत बांदकामा विशीं कसलोच बोर्ड वा गरजेची म्हायती ना. ही बांय दोंगराच्या अशे सुवातेर आसा की आशिकुशीकच्या बांयांक ह्याच दोंगराच्या झऱ्यांतल्यान उदका पुरवण जाता. ही बांय पूर्ण तांकीन वापरांत आयले उपरांत आशिकुशीच्या गांवांतल्यो सगल्यो बांयो उदका बगर आटून वतल्यो. कुंकळकार उदकाक लागून वळवळटले.
हांवें कुंकळ्ळीचे आमदार युरी आलेमांव हांकां निवेदन दिलां आनी तांणी रोखडीच हे सुवातेर भेट दिवन पळोवणी करची अशी विनंती लेगीत केल्या. नाजाल्यार संबंदीत व्यक्तीचेर एफआयआर दाखल करपा बगर दुसरो पर्याय उरचो ना अशें अॅड. मोंतेरो हांणी म्हणलें.
रामानंद देसाय हांणी म्हणलें, उद्देगीक वसणुकेंतल्या कारखान्यांतल्या कारखानदारांनी व्यापिल्ली जमीन ही पुरायपणान सोसिएदाद ह्या संस्थेची आसा. खंयचोच मनीस संस्थेची जमीन बळकावंक शकना. उद्देगीक वसणुकेंतल्या लोकां कडल्यान संस्थे कडेन कसलोच संपर्क वा कायदेशीर वेव्हार जाल्लो ना. तसो कोणूय यत्न केल्लो आसत जाल्यार ती फटवणूक आसतली अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
