भांगरभूंय | प्रतिनिधी
बेळगांव : बेळगांवच्या अबकारी खात्याच्या अधिकाऱ्यांनी गोंयांत तयार जाल्लो 47 लाख रुपयांचो सोरो बेळगांवां धरलो. काल दनपारां खानापूर – जांबोटी रस्त्यार ही कारवाय जाली.
अबकारी खात्याच्या अधिकाऱ्यांक गोंया सावन सोरो येवपाचो अासा अशी म्हायती मेळ्ळे उपरांत जांबोटी खानापूर रस्त्याचेर ट्रक आडावन अधिकाऱ्यांनी तपासणी केली. जीजे 10 /टीटी 8276 ट्रकांत सोऱ्याच्यो बाटल्यो मेळ्ळ्यो. इंपेरियल ब्ल्यू व्हिस्कीच्यो 21696 बाटल्यो अबकारी खात्याच्या अधिकाऱ्यांनी ताब्यात घेतल्यो. 3905 लिटराच्या सोऱ्याचें मोल 47 लाख रुपया जाता.
वाहनां सयत जप्त केल्ल्या सोऱ्याचें मोल 67,73,120 रुपया जाता. गाडयेच्या चालकाक ताब्यांत घेवन खानापूर पुलीस स्टेशनार गुन्यांव नोंद केला.
अबकारी अतिरिक्त आयुक्त डॉ. वाय. मंजुनाथ हांच्या फुडारपणा खाला उपआयुक्त वंजाक्षी, रवी मुगोड, निरिक्षक दावळसाब शिंदोगी, जयराम हेगडे हांणी ही कारवाय केली. कर्नाटकांत आतां वेंचणुको जावपाच्यो आसात. हे फाटभुंयेर शिमेर सोरो तशेंच हेर वस्तूंची खर तपासणी जाता. ही तपासणी सुरू आसतना गोंयचो सोरो कर्नाटकांत धरपाची कारवाय जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
