भांगरभूंय | प्रतिनिधी
कोरगांव: फाटल्या दोन म्हयन्यांत मोरजी, मांद्रें, हरमल दर्यादेग वाठारांनी देशी आनी विदेशी पर्यटकांक लक्ष्य करून तांच्या मोलादीक वस्तूंची चोरी करपी केरळ आनी कर्नाटक हांगासरले चोरांचे टोळयेंतल्या तीन दुबावितांक पेडणें पुलिसांनी अटक केल्या. तांचे कडल्यान सुमार 13 लाख रुपयांचो म्हालवज ताब्यांत घेतला.
दर्यादेग वाठारांनी चोरी करपी ह्या तीन दुबावितांक अटक केल्ल्यान पेडणें म्हालांतल्या दर्यादेग वाठारांत जाल्ल्या आनी गोंयांतल्या हेर दर्यादेगांचेर जाल्ल्या चोरयांचो सोद लागपाची शक्यताय आसा.
मजगतीं, दोन दिसां पयलीं मोरजे एका हॉटेलांत मुंबय सावन आयिल्ल्या पर्यटकांची लाखांनी रुपयांची चोरी जाल्ली.
कॅमेरा, कॅमेरा लेन्स, मोबायल फोन, ब्लुटूथ स्पिकर, अॅपल आयपॉड्स, रोख रक्कम बी अनवळखी आरोपींनी चोरी करून पर्यटकांच्या मनांत भिरांत निर्माण केल्ली. पेडणेंचे पुलीस गुन्यांवकारांक धरपा खातीर सेगीत यत्न करताले. पूण ते चोरयेची सुवात आनी पद्दत बदलत आसताले.
हे संबंदी पेडणें पुलिसांनी तपास सुरू केलो तेन्ना ह्या चोरी प्रकरणांतले दुबावीत आरोपी हे कळंगूट वाठारांत आशिल्ल्याची म्हायती तांत्रीक म्हायती वयल्यान आनी खात्रेच्या गोपां कडल्यान मेळ्ळी. ते प्रमाण पेडणेंचे निरिक्षक दत्ताराम रावत हांच्या फुडारपणा खाला उपनिरिक्षक हरीश वायंगणकार, विवेक हळर्णकार हांणी एक पंगड तयार केलो आनी आरोपींक रातीं उसरां कळंगूटे अटक केली. तातूंत शरीफ अब्दुल रेहमान, (45) कुंदेरी, वायथूर, कन्नूर केरळ, शाजी मदवन पी एम, (42), सिद्धपुरा गांव, गुय्या, विराजपेट, कोडगू कर्नाटक, श्रीतू सी. एस. सुनील कुमार, (30), चेरुविला पुथेन वीडू, कोलिथट्टू, इरिट्टी, कन्नूर केरळ हांकां मुद्देमाला सयत अटक केली ह्या दुबावीत चोरां कडेन रिट्झ मोटार, विवीध ब्रँडाचे स्मार्ट फोन, वेवसायीक कॅमेरे, वायरेलस ब्लुटूथ, इयर फोन, ब्लुटूथ स्पिकर, हातांतल्यो घडयाळी आनी हेर वस्तू मेळून 13 लाख रुपया परस चड म्हालवज जप्त केलो.
आरोपी पेडणें पुलीस स्टेशनाचे कोठयेंत आसात. गोंयांत हेर सुवातांनी चोरी जाल्ल्या आनी आरोपी सापडूंक नाशिल्ल्या प्रकरणां कडेन तांचो संबद आसा काय कितें हें सोदपा खातीर तांची खोलायेन चवकशी सुरू आसा.
आरोपी रातच्या वेळार मुखेल दाराचे कुलप मोडून वा जनेलांतल्यान भितर प्रवेश करून चोरी करताले. गुन्यांव केले उपरांत आरोपी कर्नाटक आनी केरळांत पळून वताले.
उत्तर गोंय पुलीस अधिक्षक निधीन वाल्सन आनी पेडणेंचे उपअधिक्षक राजेश कुमार हांच्या मार्गदर्शना खाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
