भांगरभूंय | प्रतिनिधी
देवस्थाना वतीन कळंगूट पुलिशेंत कागाळ दाखल
म्हापशें: गौरावाडो-कळंगूटे श्री शांतादुर्गा कळंगूटकान्न देवस्थान नानोडें देवस्थानाचे सुवातेंतली राखणे वणत जेसीबीच्या आदारान मातयेभरवण केली. ह्या प्रकरणांत देवस्थाना वतीन कळंगूट पुलिशेंत कागाळ दाखल केल्या आनी दुबावितां आड गुन्यांव दाखल करचो आनी संबंदीत जेसीबी जप्त करची अशी मागणी कागाळींतल्यान केल्या.
हो प्रकार मंगळारा घडलो. हे विशीं देवस्थानाचे आदले अध्यक्ष दिगंबर सावंत हांणी दाखल केल्या. दुबावीत म्हूण पांडुरंग मठकार, तुकाराम नार्वेंकार, राजेंद्र कोरगांवकार, ज्ञानेश्वर मठकार, गुरूदास शिरोडकार, कृष्णनाथ नानोडकार उर्फ कळंगूटकार, अॅश्ली आनी हेरां आड ही कागाळ केल्या, ह्या प्रकरणांत गरजेची ती कारवाय करतले अशें आस्वासन देवस्थान समितीच्या पदाधिकाऱ्यांक पुलीस निरिक्षक दत्तगुरू सावंत हांणी दिलें.
गौरावाड्यार सर्वे क्रमांक 118/1 हे सुवातेंत वयल्या देवस्थानाचे मालकीची 4625 चौमि. जमीन आसा. हे जमनी भोंवतणची पोरणी राखणे वणत मोडकुळेक आयिल्ल्यान थंय नवी राखणे वणत उबारिल्ली. ही वणत दोन जेसीबीच्या आदारान मोडली. हें कृत्य वयल्या दुबावितांनी केलां आनी ह्या वेळार गांवांतले सुमार 100 लोक हाजीर आशिल्ले असो आरोप पत्रकारां कडेन उलयतना दिगंबर सावंत हांणी केलो.
ह्या वेळार देवस्थानाचे अध्यक्ष सदा सावंत, विस्वास गाड, आनंद राव आनी हेर पदाधिकारी हाजीर आशिल्ले.
ही जमीन श्री शांतादुर्गा कळंगूटकान्न देवस्थान नानोडें हांच्या मालकीची आसा. कळंगूटेच्या श्री शांतादुर्गा देवस्थानाचो ह्या जमनी कडेन कसलोच संबंद ना. आमचें देवस्थान हें महाजनांचें आसा. जाल्यार कळंगूटेंतलें देवस्थान ट्रस्टाचें आसा. ताका लागून ह्या जमनीचो देवस्थाना कडेन कसलोच संबंद ना अशें आदले अध्यक्ष दिगंबर सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
