भांगरभूंय | प्रतिनिधी
कॉलेजीचें निमणें वर्स आशिल्ल्यान प्राॅजेक्टाची तयारी चालू आसा. लेखक महाबळेश्वर सैल हांच्या इंग्लिशींत अनुवादीत जाल्या चार पुस्तकांतलो ‘अंधश्रद्धा’ हो विशय. फिल्ड वर्क म्हूण लेखकाक मेळप गरजेचें आशिल्लें. कोंकणी भाशा मंडळान घडोवन हाडिल्ली ‘भास संवाद’ ही कार्यावळ म्हजे खातीर एक भांगराळी संदूच थारली. आपली मायभास सदांच आपल्याक लागीं आसता. ती आमकां आपलेपणाची जाणविकाय करुन दिता. भुरगो जेन्ना जल्माक येता तेन्ना ताच्या भावनांक आनी विचारांक मांयभासूच चालना दिता. काळजांतले उमाळे मांयभाशेंतल्यान मनीस सहजतायेन व्यक्त करपाक शकता. 21 फेब्रुवारी हो संवसारीक मांयभास दिस. ह्या दिसा निमतान भाशा मंडळान तरण्याट्यांक आनी नव्या बरोवप्यांक ‘भास संवाद’ हे कार्यावळी वरवीं साहित्यकार दामोदर मावजो आनी महाबळेश्वर सैल हांचे कडेन संवाद सादपाची एक संद दिली.
मडगांवच्या रवींद्र भवनांत सकाळीं साडेणवांक कार्यावळीक सुरवात जाली. पुराय सभाघर भुरग्यांनी गच्च भरिल्लें. भुरगींच न्हय तर शिक्षक आनी कांय लेखकूय हाजिर आशिल्ले. दोगाय जेश्ठ साहित्यकारांनी आपल्या जिविताचेर, भाशेचेर आनी साहित्याचेर भाश्य केलें. मुलाखतींत लेखकांनी आपलो गांव, मनशां, वेवसाय, जिणेंतले अणभव कशे आपल्या साहित्यांत आयल्या हें विस्तारुन सांगलें.
महाबळेश्वर सैल मूळ कारवारचे. तांचो गांव, थंयचो कृशीवेवसाय, शेतांत वावरप आनी तांचो शेता कडेन आशिल्लो संबंद तांच्या साहित्याक जापसालदार आसा. सैन्यांत घेतिल्लो अणभव, थंय केल्लो संघर्श, लेखन करपाची तरमळ आनी आत्मविश्वास तांकां साहित्य बरोवपाक उर्बा दिता. सैमाच्या सांगातान वाडिल्ल्यान, सैमान आनी नियतीन दिल्ली प्रतिमा तांकां बरोवपाक उर्बा, उमेद दिता, अशें ते म्हणटात. आमचे सरभोंवतणी जायत्यो गजाली घडटात. त्यो आमकां विचार करूंक भाग पाडटा, जायते अणभव येतात, एक लेखक वा कलाकारुच आपले कलेंतल्यान तें
लोकां मेरेन हाडटा, हें म्हाका तांच्या उलोवपांतल्यान
जाणवलें.
दामोदर मावजो माजोडें गांवचे. वेवसायांत पसरकार. पसरकार आशिल्ल्यान साहित्य रचना करुंक पावले, अशें ते म्हणटात. शिक्षणा निमतान मुंबय गेल्ले कडेन तांणी तांची संकुचित वृत्ती कशी पयस केली आनी विंगड विंगड मनशांक मेळून तांकां देशाची भिन्नताय कशी समजली हाचेर ते उलयले. जगाची वळख स्वताक घडोवन हाडपाक आनी आपल्या सदचे जिणेच्या फास्केतल्यान भायर येवपाक वाचन करप गरजेचें. एकाच भाशेंत न्हय तर विंगडविंगड भाशेंतल्यान वाचल्यार मन उक्तें जाता. ताणीं भुरग्यांक फावो तशें मार्गदर्शन दिलें. कोंकणी भाशेची गिरेस्तकाय गांवांनी आसा, थंयच्या वेवसायांनीं आसा. शब्दांची उतरावळ गोंयचे मातयेंत आसा. उतरावळ कशी शेणत चल्ल्या, चार वाक्यां एका भाशेंतल्यान उलयतलो जाल्यार धा उतरां दुसरे भाशेंतली आसता. कॉलेजींत वचपी भुरग्यांक प्रोजेक्टाच्या रुपांत गांवांगांवांनी वचून निजाची कोंकणी जाणून घेवपाक जाय, कोंकणींतली उतरावळ शेणपाक लागल्या, ती एकठांय करपाक जाय अशें तांणी सांगलें.
मनांत कांय प्रस्न आशिल्ले, ताच्यो जापो म्हाका हे कार्यावळींतल्यान मेळ्ळ्यो. दोगाय लेखकांचे उलोवप आयकून म्हाका आनिकूय वाचन करपाची उर्बा मेळ्ळी. म्हाकाय खरेंच गांवांत वचून, शेतांत वचून, थंयचो अणभव घेवन साहित्य रच्चें अशें दिसलें. कोंकणी भाशा मंडळान फुडाराकूय ‘भास संवाद’ सारकिल्ल्यो कार्यावळी घडोवन हाडच्यो, तातूंतल्यान विद्यार्थांक तशेंच नव्या बरोवप्यांक आनी साहित्य मोगींक एक नवी
चालना मेळटली, साहित्य रचपाची उर्बा मेळटली हातूंत मातूय दुबाव ना.
ईशा लवंदे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
