भांगरभूंय | प्रतिनिधी
म्हापशें: म्हापश्यां शेतांत पुरिल्ले अवस्थेंत देड वर्साच्या भुरग्याची कूड सांपडली. दुयेंत आशिल्ल्या भुरग्याक मरण आयिल्ल्यान ताका पुरिल्ल्याची म्हायती ताच्या गोंया भायल्या पालकांनी दिली. उजो पालोवपी दळाच्या जवानांक उजो पालयता आसतना ही कूड सांपडली.
मंगळारा सांजवेळा हो प्रकार उक्तडार आयलो. ह्या मरड हांगासरल्या पडींग शेतांतल्या तणाक लागिल्लो उजो पालोवपा खातीर म्हापशें उजो पालोवपी दळाचे जवान घडणूक थळार गेल्ले. उजो पालयता आसतना तांकां ही कूड सांपडली. तांणी हे विशींची म्हायती म्हापशें पुलिसांक दिली. तेबरोबर पुलीस पंगड घडणूक थळार दाखल जालो.
घडणुकेची म्हायती मेळटकूच उपजिल्होधिकारी यशस्विनी बी., मामलेदार साईश नायक, पुलीस उपअधिक्षक जिवबा दळवी, निरिक्षक परेश नायक, उपनिरिक्षक विराज कोरगांवकार, बाबलो परब, हवालदार सुशांत चोपडेंकार आनी हेर पुलिसांनी घडणूक थळार पडटाळणी केली.
कोणे तरी ही कूड हांगा पुरिल्ली आसुये असो दुबाव मुळावे चवकशे वेळार पुलिसांक आयलो. चवकशे वेळार पुलिसांनी म्हापशें बस स्टॅण्ड वाठारांतले झोपडपट्टेंत एका भुरग्याक मरण आयिल्ल्याची म्हायती मेळ्ळी.
पुलिसांनी थंय वचून चवकशी केली आनी मरण आयिल्ल्या भुरग्याच्या पालकांक सोदून काडले. तांणी ही कूड आपल्याच देड वर्साच्या चल्याची आशिल्ल्याची कबुली दिली.
मयत भुरगें दुयेंत आशिल्लें. ताका थंडी आनी खांक येताली. पांच दिसां पयलीं दुयेंत आसतनाच ताका मरण आयलें. उपरांत ताची कूड हांगा हाडून मयताच्या पालकांनी विधीवत रितीन खड्डो खणून पुरली अशी म्हायतीय ह्या मयत भुरग्याच्या पालकांनी दिली. तशेंच घडणूक थळार फुलां आनी फुलांहार पुलिसांक सांपडलो. ह्या कुडी वयली माती रस्ताद सुण्यांनी थोड्या प्रमाणांत काडिल्ली.
पांच दिसां पयलीं ह्या कुटुंबांतल्या देड वर्साच्या भुरग्याक खांक आनी थंडी जाल्ली. ह्या दुयेंतपणांतूच ताका मरण आयिल्ल्याची जबानी ह्या कुटुंबान पुलिसांक दिली. ह्या कुटुंबान उपरांत ही कूड मरड हांगासरल्या पडींग शेतांत खड्डो खणून ती विधीवत पुरिल्ली.
मजगतीं, मयत भुरग्याचे पालक हे गोंया भायले आसून नव्या बस स्टॅण्ड वाठारांत खोंप बांदून रावतात. वेळावेळार पालिकेन ह्या खोंपींचेर कारवाय केली, पूण ह्यो खोंपी परतून उब्यो रावल्यात.
उपअधिक्षक जिवबा दळवी हांणी म्हणलें, शेतांत पुरिल्ले स्थितींतली देड वर्साच्या भुरग्याची कूड सांपडली. ह्या भुरग्याच्या पालकांचो सोदूय आमी लायलो. मुळावे चवकशे वेळार ह्या प्रकाराक कसलोच दुबाव दिसून आयलो ना. पंचनामो करून कूड आमी मरणा उपरांतचे तपासणी खातीर धाडून दिल्या.
मयत भुरग्याचे पालक हे मूळचे उस्मानाबाद महाराष्ट्रांतले आसून हें कुटुंब कार्नावाला वेळार गोंयांत दाखल जाल्लें. म्हापशें बस स्टॅण्डाच्या शेजराक खोंपीत ते रावतात. बोमाडे वा हेर साहित्य विकून आपलें पोट भरपी परिवार आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
