भांगरभूंय | प्रतिनिधी
म्हापशें: बार्देस म्हालांतल्या शिक्षकांनी आनी विद्यार्थ्यांनी म्हादय संदर्भांतल्या उपक्रमांत वा सर्तींनी वांटेकार जावचे न्हय अशीं मार्गदर्शक तत्वां (अॅडव्हायजरी) बार्देसचे भाग शिक्षणाधिकारी किरण चौकेकर हांणी जारी केल्ली. हे विशीं मंगळारा सेव्ह गोवा, सेव्ह म्हादय फ्रंटाच्या पदाधिकाऱ्यांनी हे विशीं जाप विचारले उपरांत ही अॅडव्हायजरी फाटीं घेतली.
व्हॉट्सअॅपाच्या माध्यमांतल्यान भाग शिक्षणाधिकाऱ्यान ही अॅडव्हायजरी बार्देस म्हालांतल्या 57 विद्यालयांक धाडिल्ली. ही म्हायती मेळटकूच सेव्ह गोवा, सेव्ह म्हादय फ्रंटाच्या पदाधिकाऱ्यांनी म्हापशेंच्या उत्तर गोंय जिल्हो शिक्षण कचेरेंत ह्या अधिकाऱ्यांची भेट घेवन तांकां धारेर धरले.
हातूंत प्रा. प्रजल साखरदांडे, अॅड. हृदयनाथ शिरोडकार, महेश म्हांबरे, अमन लोटलीकार, राजन घाटे, जितेश कामत, अॅड. शशांक नार्वेंकार आनी हेर मानेस्त हाजीर आशिल्ले.
म्हादय बचाव फ्रंटाच्या ह्या पदाधिकाऱ्यांनी भाग शिक्षण अधिकाऱ्याचेर प्रस्नांचो भडिमार केलो. तांकां धारेर धरले. उपरांत तांणी ही अॅडव्हायजरी फाटीं घेत आशिल्ल्याचें फ्रंटाक सांगलें.
ह्या अॅडव्हायजरी वरवीं विद्यालयांतले शिक्षक वर्ग तशेंच विद्यार्थ्यांक म्हादयचो उपक्रम, बसका, कार्यावळी वा सर्तींनी वांटेकार जावपाक मनाय केल्ली. तशेंच म्हादय विशीं खंयचीय कार्यावळ आयोजीत करपाकूय मनाय केल्ली.
ही अॅडव्हायजरी हांवें कोणाच्या चेपणाक बळी पडून जारी करूंक नाशिल्ली अशी म्हायती फ्रंटाच्या पदाधिकाऱ्यांक चौकेकर हांणी दिली. हो निर्देश फाटीं घेवचो, नाजाल्यार कचेरेंतूच बसकण मारून आंदोलन करतले अशी शिटकावणी फ्रंटान दिली.
चौकेकर हांणी अॅडव्हायजरींत गरजेचे ते बदल करतले अशें सांगलें. पूण दुरुस्ती करप मान्य नासून ती पुरायपणान रद्द करची अशी ठाम भुमिका फ्रंटान घेतली. उपरांत चर्चा जावन निमाणें सदर अॅडव्हायजरी फ्रंटाच्या सामकार चौकेकर हांणी फाटीं घेतली अशी म्हायती महेश म्हांबरे आनी राजन घाटे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
