भांगरभूंय | प्रतिनिधी
भलायकी बरी जाल्यार मनीस सुखी म्हण्टात. बरी भलायकी मनशाक शारिरीक वा मानसीक नदरेन घटाय दिता. आपलें जिवीत पुराय तांकीन जगपाक आदार करता. अस्वस्थ जिणे पद्दतीक लागून मनशाचें बरेपण इबाडटा. निरोगी आनी तंदुरुस्त रावप दरेक पिळगे खातीर खूब म्हत्वाचें. व्यायाम करप आनी बरें जेवण जेवप हे शारिरीक आनी मानसीक दोनूय नदरेन भलायकी तिगोवन दवरपाचे सगळ्यांत बरे उपाय जावन आसात.
भलायकी गंभीरतायेन घेवपी आनी आपली फिटनेस सांबाळपा खातीर गंभीर आशिल्ले लोक दिसपट्टे व्यायाम करतात, बरें जेवण खाण खातात आनी फावो त्या वेळार बरी न्हिदूय घेतात. तंदुरुस्त आसल्यार आमका सक्रिय रावपाक मेळटा आनी आमचो आत्मविस्वास, एकाग्रताय आनीक वाडटा. आमी फीट रावल्यार हेरांक आदर्श थारावंक मेळटा आनी ल्हवू ल्हवू हेरांचीय भलायकी, पोशण, गिन्यान आनी टिकावूपणान तयार केल्ल्या खाणां-जेवणांचो वापर वाडोवपाक मदत करूं येता.
भलायकी इबाडपाचीं मुखेल कारणां
विद्यार्थ्यांक चड करून शाळेच्या कामा विशीं आनी परिक्षे विशीं ताण दिसता. वेवसायीकांकूय आपल्या जिविताच्या आनी कामाच्या संदर्भांतय ताण येवपाची शक्यताय आसता, अशे परिस्थितीक लागून मानसीक भलायकी इबाडटा.
सिगार, सोरो, सांबाळून दवरिल्लीं खाणां (सुकें खाण) आदी हानीकारक पदार्थांचे सेवन केल्यार शारिरीक आनी मानसीक भलायकेचेर आनी फिटनेसाचेर वायट परिणाम जाता.
न्हीद उणी
लोक रातच्या वेळार काम करतात, भुरगी उसरां मेरेन अभ्यास करतात, कांय लोक सतत फोन वापरतात आदी . वैजकी तज्ञांनी सुचयल्ले प्रमाण दरेका व्यक्ती खातीर न्हिदेचो थारायिल्लो वेळ सक्तीचो आसता. न्हीद नाशिल्ल्यान अयोग्य जिणे पद्दत तयार जाता. तेन्ना सगल्यांनी वेळार न्हिदपाक जाय आनी सकाळीं शक्य तितलें बेगीन उठपाक जाय.
जंक फूड्स
जंक फूडान मनशान खावपाक जाय आशिल्ल्या योग्य पोशण आहाराची सुवात घेतल्या. देखून नाका जाल्ल्या जेवणाची संवय भलायकी इबाडटात. कांय तरणाटे भुरगे सद्दां पिझ्झा, रस्सा आम्लेट. भजीं, मिरची, सामोसे खातात. ताचो 40 वर्सा जालीं काय परिणाम दिसता.
भलायकी कशी सांबाळप
दरेक व्यक्तीन दिसपट्ट्या व्यायामा खातीर थारायिल्ल्या वेळाचेर लक्ष केंद्रीत करचें, कारण ताचो थेट परिणाम मनशाचे मानसीक आनी शारिरीक भलायकेचेर जाता. जिमांत वचपाकूय जाय अशें ना. घरचे घरा व्यायाम करूं येता.
सकाळीं पासयेक वचूं येता. दूद हाडपाक, बाजार हाडपाक सकाळीं चलत वा सायकलीन वचूं येता.
खावपा – पिवपाच्या दर एका वस्तूचेर लक्ष केंद्रीत करचें. गरजेचीं खनिजां, जीवनसत्वां आनी प्रथिनां हांचो आस्पाव आशिल्लो समतोल आहार आसल्यार मनीस निरोगी आनी फिट जाता. तेलकट, मसाल्याचें शक्यतो टाळचें. आमची भोंवतणची सुवात निवळ आनी आमकां जियेवपा खातीर योग्य हाची खात्री करची. फावो त्या प्रमाणांत न्हीद घेवची. दरेक व्यक्तीन वैजकी नेमा प्रमाण उण्यांत उणी 7 ते 8 वरां न्हीद घेवची. एक लीटर तरी उदक सद्दां पियेवचें, कारण ताका लागून विखारी पदार्थ भायर वचपाक मजत जाता, मनशाचें पचन सुदारपाक मदत जाता.
जिणे कडेन सकारात्मक नदर दवरात. मानसीक भलायके खातीर फिट रावात. सुखी रावपा खातीर आनी मानसीक भलायकी तिगोवन दवरपाक मनाचेर सकारात्मक विचारांनी राज्य करपाक जाय. फिट रावप हें सगळ्यांत मुखेल प्राधान्य म्हणून घेतल्यार कठीण न्हय. वयर सांगिल्लीं सादे उपाय पाळून आमच्यांतल्या दरेकल्याक भलायकेन भरिल्लें, फळादीक जिवीत जगूं येता. विचार समतोल दवरप, पोशक आहार, खर व्यायाम, योग, न्हिद ही प्रत्यक्षांत आमच्या बरे जिणे पद्दती खातीर मुखेल योगदान दिवपी घटक आसात.
अस्वस्थ आनी अयोग्य जिणेशैली निर्माण करपी परिस्थिती आमी तयार
करतात. हें एक तथ्य. देखून आमी बऱ्यो संवयी लावन घेवपाक जाय.
संजना शेटकार
8010291844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
