भांगरभूंय | प्रतिनिधी
म्हापशें: गिरी ग्रीन पार्क जंक्शना कुशीक मोटारीन बशीक धपको दिल्ल्यान जाल्ल्या अपघातांत तीन गाडयांचें लुकसाण जालें. ह्या अपघातांत कोणाकूच दुखापत जाली ना. पुलीस अधिक्षक निधीन वाल्सन हांणी अपघाताक लागून जाल्ली कोंयडी सुटावी केली.
हो अपघात बुधवारा सांजवेळा 3.50 वरांच्या सुमाराक ग्रीन पार्क जंक्शना कुशीक आशिल्ल्या बस स्टॉपा मुखार घडलो. जीए 05 एफ 5495 क्रमांकाची क्वीड मोटारींतल्यान खुशी चौधरी (बायंगिणी, तिसवाडी) ही चालक तरणाटी म्हापशें सावन पणजीचे दिशेन वताली. जाल्यार जीए 03 टी 1742 क्रमांकाची प्रवासी बस पणजे सावन म्हापश्यां वताली. ही बस समीर नार्वेंकार चलयतालो. बस घडणूक थळार पावतकूच मुखा वयल्यान गतीन येवपी मोटारीन बसीक धपको दिलो. जाल्यार फाटल्यान येवपी जीए 01 एस 9404 क्रमांकाचे होंडा सिटी मोटारीन अपघात जाल्ले मोटारीक फाटल्यान धपको दिलो. ही मोटार इम्तीयाज नारंगी (गांवसवाडो, म्हापशें) चलयतालो. अपघाता उपरांत चालक तरणाटीचें मोटारी वयलें नियंत्रण गेलें आनी मोटार रस्त्याचे मदीं आडवी जावन उबी रावली.
हाका लागून म्हापशें गिरी मार्गार येरादारीची कोंयडी जाली. ह्याच वेळार म्हापशें पुलीस स्टेशनार आयिल्ले पुलीस अधिक्षक निधीन वाल्सन पर्वरे वताले. तांणी म्हापशें पुलिसांचे मजतीन अपघातग्रस्त मोटार रस्त्या वयल्यान कुशीक काडून येरादारीची कोंयडी सुटावी केली.
अपघाताचो पंचनामो पुलीस हवालदार अभिजीत माणगांवकार हांणी केलो. फुडलो तपास पुलीस करतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
