भांगरभूंय | प्रतिनिधी
हे मागणे खातीर गिरीश चोडणकाराची खंडपिठांत याचिका
8 फुटीर आमदारां आड दाखल केल्ली अपात्रताय याचिका
पणजी: काँग्रेसीच्या 8 फुटीर आमदारां आड दाखल केल्ले अपात्रताय याचिकेचेर सभापतीन रोखडीच सुनावणी घेवपा खातीर निर्देश जारी करचो, हे मागणे खातीर काँग्रेसीचे फुडारी गिरीश चोडकारान मुंबय उच्च न्यायालयाच्या गोंय खंडपिठांत याचिका दाखल केल्या.
हे याचिकेंत गिरीश चोडणकारान सभापती, मायकल लोबो, दिगंबर कामत, आलेक्स सिक्वेरा, संकल्प आमोणकार, डिलायला लोबो, केदार नायक, राजेश फळदेसाय आनी रुडोल्फ फर्नांडीस हांकां प्रतिवादी केल्यात.
गोंयांत फेब्रुवारी 2022 त विधानसभेची वेंचणूक घेतिल्ली. त्या वेळार 10 मार्च 2022 दिसा निकाल जाहीर जाल्लो. ते प्रमाण भाजपाचे 20, काँग्रेस पक्षाचे 11, मगो पक्षाचे 2, गोवा फॉरवर्ड पक्षाचो 1, आम आदमी पक्षाचे 2, रिव्हॉल्युशनरी गोवन्स पक्षाचो 1 आनी तीन अपक्ष अशी आमदारांची संख्या आशिल्ली. भाजपाचें संख्याबळ 20 आशिल्ल्यान आनी सगल्यांत मोटो पक्ष आशिल्ल्यान राज्यपालांनी तांकां सत्ता स्थापन करपाक दिली.
त्या वेळार डॉ. प्रमोद सावंत हांणी मगो आनी अपक्ष आमदारांचो तेंको घेवन सरकार स्थापन केलें. उपरांत 14 सप्टेंबर 2022 दिसा काँग्रेसीच्या आठ आमदारांचो दोन तृतियांश विधीमंडळ गट भाजपांत विलीन जालो. ह्या प्रकरणांत याचिकादार चोडणकारान वयल्या आठ आमदारांक अपात्र करपाची याचिका 11 नोव्हेंबर 22 दिसा सभापती कडेन दाखल केल्ली.
ह्या प्रकरणांत दोन म्हयन्यां परस चड दीस जाल्ले आसतना सभापतीन कसलीच कारवाय सुरू केल्ली ना. ताका लागून याचिकादार चोडणकारान खंडपिठांत याचिका दाखल करून सभापतीक अपात्र याचिकेचेर सुनवाणी रोखडीच घेवपाचो निर्देश जारी करपाची मागणी करपी याचिका खंडपिठांत दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
