आयआयटी प्रकल्प विरोधी आंदोलकांचेर अन्याय

भांगरभूंय | प्रतिनिधी

सरकारान ताकतिकेन गुन्यांव फाटीं घेवपाची मागणी

वाळपय: शेळ मेळावली आयआयटी प्रकल्पा संबंदी सरकारान आंदोलनकर्त्यांचेर अन्याय केला. दाखल केल्ले गुन्यांव फाटीं घेवपा विशींचें आस्वासन दिल्लें. पूण तें आस्वासन तांणी पुराय केल्लें ना. ते खातीर सरकारान हे विशीं गंभिरतायेन विचार करचो आनी शेळ मेळावली हांगासरल्या आंदोलनकर्त्यांचेर दाखल केल्ले गुन्यांव बेगोबेग फाटीं घेवचे अशी मागणी केल्या.

वट्ट 22 जाणांचेर सरकारी यंत्रणेक आडमेळीं हाडिल्ल्या संदर्भाचे खटले दाखल केल्यात. ते विशींची सुनावणी वाळपयच्या न्यायालयांत सुरू जाल्या. ताची पयली सुनावणी बुधवारा जाली. ह्या वेळार हाजीर आशिल्ल्या आंदोलनकर्त्यांनी थळाव्या पत्रकारां कडेन हे विशीं उलयतना सरकारान अन्याय केल्ल्याचें म्हणलां.

दाखल केल्ल्या आंदोलनकर्त्यां मदीं दशरथ मांद्रेकार, विश्वेश परोब, रोशन देसाय, शशिकांत सांवड्डेंकार, उन्नती मेळेकार, पुजा मेळेकार, उषा मेळेकार, संदीप नायक, सिध्दु गांवकार, उर्मिला मेळेकार, रामनाथ उसपकार, कल्पेश मेळेकार, सिया सांवड्डेंकार, चंद्रकांत भामयकार, रोहिदास मेळेकार, कृष्णा कासकार वसंत मेळेकार, मंगेश मेळेकार, प्रभाकर गावडे, लक्ष्मी मेळेकार आनी विधिशा सांवड्डेंकार हांचो आस्पाव आसा.

हे विशींची म्हायती अशी, 6 जानेवारी 2021 दिसा सरकारान शेळ मेळावली हांगा प्रस्तावीत सुवातेंत सर्वेक्षण सुरू केल्लें. ह्या वेळार थळाव्यांनी आंदोलन करून सरकारी यंत्रणेक आडखळ निर्माण केल्ली. हाका लागून 22 जाणांचेर वाळपयच्या पुलीस स्टेशनार गुन्यांव दाखल केल्लो. हे विशींचें आरोपपत्र वाळपयच्या न्यायालयांत दाखल केल्लें. ताची पयली सुनावणी बुधवारा घेतली.

हे सुनावणे खातीर दाखल केल्ले 22 जाण हाजीर आशिल्ले. ह्या वेळार तांणी पत्रकारां कडेन उलयतना सांगलें की, सरकारान आयआयटीचो प्रकल्प रद्द केला. जांचेर गुन्यांव दाखल केल्यात ते फाटीं घेवपाचें सरकारान आस्वासन दिल्लें. पूण त्या आस्वासनाची पुर्तताय जाल्ली ना. हाका लागून तांणी निरशेणी उक्तायली. सरकारान हे विशीं गंभिरतायेन विचार करचो आनी दाखल केल्ले गुन्यांव बेगोबेग फाटीं घेवचे अशी मागणी तांणी केली.

हे विशींची फुडली सुनावणी 15 फेब्रुवारी दिसा घेतले. ताचे पयलीं सरकारान हे विशीं धोरणात्मक निर्णय घेवचो अशी विनंती आंदोलनकर्त्यांनी केल्या.