भांगरभूंय | प्रतिनिधी
विमानांत बॉम्ब आशिल्ल्याची वावडी; प्रवाशां मदीं फुल्लो हांसो
वास्को: बॉम्ब दवरिल्ल्याचो संदेश मेळ्ळे उपरांत सोमारा रातीं गुजरातांतल्या जामनगर विमानतळार आणिबाणी प्रसंगा वेळार देंवयिल्लें रशिया अॅरलायन्सीचें आझूर चार्टर विमान मंगळारा सगल्या प्रवाशांक घेवन दाबोळी विमानतळार सुरक्षीतपणान देंवलें. बॉम्ब दवरिल्ल्याचो संदेश मेळ्ळे उपरांत भिरांतींत आशिल्ल्या प्रवाशां मदीं हांसो फुल्लो.
रशियन अॅरलायनीसीच्या मॉस्को ते गोवा चार्टर विमानांत बॉम्ब दवरिल्ल्याचो संदेश मेळ्ळे उपरांत हें विमान जामनगर विमानतळार सोमारा रातीं देंवयिल्लें. ह्या विमानांत क्रू मेंबर्सा सयत 244 प्रवाशी आशिल्ले. विमानांत बॉम्ब दवरिल्ल्याचो संदेश मेळ्ळे उपरांत तांचे मदीं भिरांत पातळिल्ली. जामनगर विमानतळार तांकां सुरक्षीतपणान विमाना भायर देंवयले. उपरांत बॉम्ब निकामी करपी पंगड, एनएसजी आनी गुजरात पुलीस बी सुरक्षा यंत्रणे वतीन सुमार स वरां त्या विमानाची खोलायेन तपासणी केली. पूण कांयच मेळूंक नाशिल्ल्यान ती एक वावडी आशिल्ल्याचें स्पश्ट जालें. हो संदेश कोणे दिलो आनी कित्याक दिलो हे विशीं चवकशी सुरू जाल्या.
ह्या विमानांत बॉम्ब दवरिल्ल्याचो संदेश मेळ्ळे उपरांत गोंयांतली सुरक्षा यंत्रणा सतर्क जाल्ली. वास्कोचे पुलीस उपअधिक्षक सलीम शेख, निरिक्षक कपील नायक तशेंच हेर पुलीस अधिकारी, बॉम्ब निकामी करपी पंगड, उजो पालोवपी दळ बी तैनात केल्ले.
मजगतीं, विमान दाबोळी विमानतळार देंवय नासतना जामनगरांत देंवयलें. मंगळारा त्या विमानांतल्या सगल्या प्रवाशांनी दाबोळी विमानतळार देंवले उपरांत खोस उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
