भांगरभूंय | प्रतिनिधी
मुख्यमंत्री: दिवचले निवासी संस्कृत वर्गाचें उक्तावण
दिवचल: संस्कृत भास ही बौध्दीक चातुर्य, विचारांची खोलाय, तत्वगिन्यान, आदर्श मनीस घडोवपाची तांक आशिल्ली सगळ्या भासांची आवय जावन आसा. ही भास पुराय संवसाराची भास जावची म्हणून भारत यत्न करता. देखून मुळाव्या पांवड्या सावन भुरग्यांक संस्कृतीचे धडे दिवपाचो यत्न राज्य सरकार करता. दरेका विद्यार्थ्यान ताका आत्मसात करून सुसंस्कृत समाज घडोवपाक आदार दिवचो, अशें मुख्यमंत्री डॉ. प्रमोद सावंत हांणी सांगलें.
संस्कृत भारती गोंय आनी राजभास संचालनालया वतीन सात दिसांचें निवासी संस्कृत प्रबोधन वर्गाचें उक्तावण मुख्यमंत्र्या हस्तुकीं दिवली पेटोवन जालें. ह्या वेळार ते मुखेल सोयरे ह्या नात्यान उलयताले.
नव्या शिक्षणीक धोरणांत राष्ट्रीय आनी आवय भाशेंतल्यान शिक्षणाचेर भर दिल्या. पंदरा विद्यार्थी संस्कृत घेतात जाल्यार सरकार ताचे खातीर वेगळो शिक्षक नेमता. देखून संस्कृत भास आयज करिअर करपी भास जावपाची आसा. हें मतींत दवरून मुळाव्या पांवड्यार संस्कृत विशयाची आवड वाडोवन, संस्कृत गिन्यानाची पद्वी मेळोवची आनी संस्कृत भास शिकची असो उलो मुख्यमंत्र्यान दिलो.
आयुर्वेदीक शिक्षणांत संस्कृत खातीर 100 गुणांचो पेपर आसता आनी सगळे ग्रंथ संस्कृत भाशेंत आशिल्ल्यान संस्कृत शिकचेंच पडटा पूण ती कायम तिगतली हाचे कडेन लक्ष दिवचो असो उलो दिवन, राज्यांत संवसारीक दर्जाचें आयुर्वेदीक महाविद्यालय धारगळे सुरू केलां. संस्कृतचो प्रचार प्रसार करपा खातीर सगळ्या घटकांनी फुडाकार घेवचो, अशें डॉ. सावंत हांणी फुडें म्हणलें.
ह्या वेळार माचयेर सागर शेट्ये, विठ्ठल भट, मनोहर काजरेकार, आनंद देसाय, चिन्मय आमशेकार, प्रसाद उमर्ये आनी हेर हाजीर आशिल्ले.
चिन्मय आमशेकार हांणी सगळ्यांक येवकार दिलो. ह्या वेळार महाबल भट हांच्या संस्कृत पुस्तकाचें प्रकाशन मानेस्तां हस्तुकीं जालें. प्रसाद उमर्ये हांणी प्रास्तावीक केलें.
ह्या निवासी वर्गांत गोंय, कोकणांतले 90 विद्यार्थी वांटेकार जाले. केशव सेवा साधना विद्यालयांत हे वर्ग सुरु आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
