भांगरभूंय | प्रतिनिधी
उदयसिंग राण: गोवा धनगर समाज सेवा संघ सत्तरी 32 वो वर्धापनदीस मनयलो
वाळपय: धनगर समाजान शिक्षणीक मळार क्रांती करपाचो यत्न करचो. शिक्षणीक मळार ह्या समाजांतल्या वांगड्यांनी बरें काम केलां. तांकां बरी नोकरी मेळपाक शकता. तशेंच अर्थीक नदरेन उणे आशिल्ल्या घटकांक उदरगतीच्या प्रवाहांत वांटेकार करून घेवपा खातीर समाजसेवा संघटणेन यत्न करचे, अशी मागणी सरपंच उदयसिंग राणे हांणी केली.
गोवा धनगर समाज सेवा संघ सत्तरी हे संघटणेच्या 32 व्या वर्सुकी वर्धापनदिसा निमतान आयोजीत कार्यावळ श्री रुद्राक्ष उत्पादन सहकारी संस्था सभा मंडप अनसोले नाणूस हांगा जाली. ह्या वेळार मुखेल सोयरे म्हणून सरपंच राणे उलयताले.
ह्या वेळार थळावी पंच वांगडी रुपाली प्रदिप गांवकार, संघटणेचे अध्यक्ष धुळू शेळके, संस्थेचे संस्थापक आदले अध्यक्ष बाबू हुमाणे, कार्याध्यक्ष बाबू झोरे, सुटके झुजारी भैरो वरक, समाजसेवक बाबू खरवत आनी अनसोले गांवांतले ज्येश्ठ नागरीक बाबू पिंगळे हाजीर आशिल्ले.
ह्या वेळार मानेस्तां हस्तुकीं ‘म्हालची पांढरी’ दिनदर्शिकेचें अनावरण केलें. तशेंच विवीध मळावेल्यान मानेस्तांचो आनी गुणेस्त विद्यार्थ्यांचो भोवमान केलो. डॉ. बिंदिया गंगाराम हुमाणे हांचोय ह्या वेळार भोवमान जालो.
समाज संघटनेचे अध्यक्ष धुळू शेळके हांणी, येवपी काळांत सत्तरी म्हालांतल्या सगळ्या भावांक एकसंघ करून समाजाचे उदरगती खातीर यत्न करतले, अशें तांणी सांगलें.
भलायकी मंत्री विश्वजीत राणे हांणी, पर्यें मतदारसंघाचे आमदार डॉ. देविया राणे हांच्या सहकार्यान आनी प्रतापसिंह राणे हांच्या आशिर्वादान समाजाची वाटचाल बरे तरेन जावची देखून यत्न करतले, अशें तांणी सांगलें.
सुत्रसंचलन संघटणेचे उपाध्यक्ष लक्ष्मण झोरे हांणी केलें. संघटणेचे भांडारी जानू पिंगळे हांणी सगळ्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
