भांगरभूंय | प्रतिनिधी
देविता खुळेचे ‘ममत्व’ कथिकेक पयलें इनाम
पणजी: शेणै गोंयबाब सेवा केंद्र, सावड्डे कुडचडे हे संस्थेन घडोवन हाडिल्ल्या अखील गोंय कोंकणी कथिका लेखन सर्तीचो निकाल जाहीर केला. हातूंत काणकोणच्या देविता खुळे हिचे ‘ममत्व’ हे कथिकेक पयलें इनाम फावो जालें.
दुसरें इनाम शितल परब, तळगांव, पणजे हांचे ‘घुस्मट’ कथिकेक दुसरे इनाम, जाल्यार तुलसी पर्येंकार, तार, धावें सत्तरी हांचे ‘म्हादयच्या कुसव्यांत’ कथिकेक तिसरें इनाम फावो जालें. ‘गिरेस्तकाय’ हे तन्मयी सहकारी, बिम्बल कुळे हाचे कथिकेक, गोगळ-मडगांवच्या वर्धा खांडेपारकाराचे ’बुरखो’ आनी अनिकेत वांयगणकार, म्हापशे, बार्देस हाचे ‘डिवोर्स’ कथिकेक वळीन पयलें, दुसरें, तिसरें उमेद वाडोवपी इनामां फावो जालीं.
परिक्षक म्हुणून ज्येश्ठ शिक्षक तशेंच लेखक डॉ. सर्वानंद सावंत देसाय, प्रा. मनिषा उपाध्ये आनी शैलेश संझगिरी हांणी वावर केलो. जैतिवंताक केंद्राचे फुडले जाहीर कार्यावळींत इनामा भेटयतले. हे संबंधीची वेळ, दीस आनी थळ कळयतले अशें निमंत्रक स्नेहल नायक हांणी सांगलें.
मजगतीं आदीं जाहीर केल्ली केंद्राची सर्गेस्त राजेंद्र (राजू) चिमणू नायक यादस्तीक अखील गोंय कोंकणी कविता वाचन/सादरीकरण सर्त आयतार ता. 15 जानेवारी, 2023 दिसा जातली. ते खातीर आयोजकांकडेन कविता धाडपाची निमाणी तारीख शेनवार 7 जानेवारी 2023 अशी आसा. सर्तीच्यो कविता 9673138085 (स्नेहल), 7768992800 (स्नेहा), 9923333232 (मोहनदास) ह्या क्रमांकांचेर व्होट्सअॅप करच्यो, अशें कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
