आमच्यो समस्या आसात त्यो सोडोवच्यो

भांगरभूंय | प्रतिनिधी

उत्तर, दक्षीण खण ट्रक धनी संघटणेच्या पदाधिकाऱ्यांची मागणी

पणजी: सरकारान खणी सुरू करपाचो निर्णय घेतिल्ल्यान आमी मुख्यमंत्री डॉ. प्रमोद सावंत हांचें अभिनंदन करतात. पूण फाटलीं 10 वर्सां खणी बंद आशिल्ल्यान ट्रक धनयांच्यो ज्यो समस्या आसात त्यो रोखड्योच सोडोवच्यो अशी मागणी उत्तर आनी दक्षीण गोंय खण ट्रक धनी संघटणेच्या पदाधिकाऱ्यांनी बुधवारा पणजेंत पत्रकार परिशद घेवन केली.

ह्या वेळार उत्तर गोंय खण ट्रक धनी संघटणेचे अध्यक्ष सत्यवान गांवकार, दक्षीण गोंय खण ट्रक धनी संघटणेचे अध्यक्ष प्रकाश देसाय, बुबराय देसाय आनी हेर पदाधिकारी हाजीर आशिल्ले.

सरकारान खण पिडितांक बरे तरेन मजत केल्या. पूण ट्रककारांच्यो कांय मागण्यो आसात त्यो पुराय केल्ल्यो नात. ह्या ट्रकांक 15 वर्सां पुराय जाले उपरांत धनयांक हरीत टॅक्स येरादारी खात्याक भरचो पडटा तो सदळ करचो. गोंयांतले 90 टक्के ट्रकांक 15 वर्सां पुराय जाल्यात. कारण फाटलीं 10 वर्सां खणी बंद आशिल्ल्यान हे ट्रक फक्त 5 वर्सांच चल्ले. ताका लागून सरकारान मोटार वाहन कायद्यांत बदल करून ह्या ट्रकांची वर्सां वाडोवन दिवची अशी मागणी उत्तर गोंय ट्रक धनी संघटणेचे अध्यक्ष सत्यवान गांवकार हांणी केली.

तेच प्रमाण फिटनेस दाखलो मेळोवपा खातीर येरादारी खात्याक कर भरचो पडटा तो उणो करचो. ट्रक चलयत नासले तरी नायलाजान आमकां हे पयशे भरचे पडटात. तशेंच रस्त्याचो करूय भरचो पडटा. हेर राज्यांनी हो कर खूब उणो आसा. तेचप्रमाण खणी सुरू करचे पयलीं ट्रककारां कडेन बसका घेवन योग्य प्रमाणांत भाडें दर थारावचें. अशे तरेच्यो खूबशो मागण्यो आसात. हें निवेदन आमी मुख्यमंत्र्याक दिलां आनी सरकारान हाची दखल घेवची अशें ह्या वेळार सत्यवान गांवकार हांणी सांगलें.

खणी बंद आसल्यो तरी सरकारान खण पिडितांक सगली मजत केल्या. आमी सरकारा कडेन लुकसाण भरपाय मागनात. जे गरजे भायर येरादारी खात्याक पयशे भरचे पडटात ते उणे करचे. तशेंच खणी सुरू जावचे पयलीं ट्रक धनयांक विस्वासांत घेवन दर थारावचे. जेणे करून आमच्यो समस्या सुट्टल्यो अशें सत्यवान गांवकार हांणी सांगलें.

सरकारान खणी सुरू करपाचो घेतिल्लो निर्णय हो सगल्या खण पिडितांक एक नवी उर्बा दिवपी आसा. सगल्या खण पिडितांक विस्वासांत घेवन सगल्यांक सहकार्य करचें अशें सत्यवान गांवकार हांणी म्हणलें.