आमच्या क्लबांत डान्सबार ही संकल्पनाच ना

भांगरभूंय | प्रतिनिधी

कळंगूटेच्या क्लब धनयांचो दावो

म्हापशें: डान्सबार ही आमच्या कल्बांत संकल्पनाच ना. आमचे सगले वेव्हार हे कायदेशीर आनी पारदर्शक आसात. पूण कांय गुंड प्रवृत्तीचे लोक खंडणी खातीर कळंगूट पंचायतीचे नांव घेवन आमचे क्लब बंद करपाक मुखार सरल्यात असो आरोप चावला आनी डेव्हील ह्या क्लबाचे जोड धनी विपीन सिंगान केलाे.

बुधवारा कळंगूटे क्लब धनयांची जोड पत्रकार परिशद आयोजीत केल्ली तेन्ना ते उलयताले. तांचे सयत तांव आनी ट्रॉपीकल क्लबाचे नरेश गिडवानी, बे-वॉचचे दीपक देसाय, थ्री किंग्स आनी 39चे हरीष निर्लेकार आनी हेर हाजीर आशिल्ले.

कळंगूट पंचायतीन दिल्ल्यो कारणा दाखय नोटीसो बेकायदो बांदकामा संदर्भांत आसात. आमच्या आस्थापानांतल्या वेवसाया कडेन निगडीत नात. आमच्या क्लबांत डान्सबार, पोल डान्स वा बारबाला असो कसलोच गैरप्रकार चलना. ह्यो खबरो फक्त माध्यमांनीच उजवाडा येतात. क्लबांत अशे गैरप्रकार सुरू आसल्यार कोणेय पुराव्या सयत दाखोवन दिवचें. जशे हेर नामनेचे क्लब आनी आस्थापनां ही बार अ‍ॅण्ड रॅस्टोरंण्टाच्या परवान्याचेर चलतात, तेच धर्तेर आमी लेगीत वेवसाय करतात अशें विपीन सिंगान स्पश्टीकरण दिलें.

सिंगान मुखार म्हणलें, कळंगूटे कांय गुंड प्रवृत्तीचे लोक पंचायतीच्या नांवार आमच्या क्लबांनी घुसखोरी करून खंडणीच्या स्वरुपांत पयशांची मागणी करतात. तशेंच क्लबाच्या कर्मचाऱ्यांक मारपेट करतात. पंच वांगड्याच्या चल्याक मारपेटीचो प्रकार घडत सावन हे प्रकार सुरूच आसात. हे विशीं खूबशे फावटी पुलीस कागाळी लेगीत केल्यात, पूण अपेक्षीत कारवाय जाल्ली ना. हाची कल्पना पुलीस म्हासंचालक आनी म्हानिरिक्षकांक दिल्या. हे विशीं मुख्यमंत्र्यांकूय निवेदन दितले. आमकां आमदार वा पंचायत त्रास दिना, जाल्यार थळावे गुंड प्रवृत्तीचे लोक आमची सतावणूक करतात अशें सिंग हांणी म्हणलें.

पंचायतीन नोटिसो दिल्ल्यान फाटल्या 5 डिसेंबरा सावन आमचे क्लब बंद आसात. पयर आयतारा मध्यान रातीं डेव्हिल्स क्लब बंद आसतना कांय गुंड प्रवृत्तीचे लोक क्लबांत घुसले. क्लब केन्ना सुरू करतले अशें म्हणून जेवण हाडपाक भायर गेल्ल्या क्लबांतल्या कर्मचाऱ्याक तांणी मारपेट केली असो आरोप सिंगान केलो.

फाटल्या 17 ते 18 वर्सां सावन आमी कळंगूटे वेवसाय करतात. क्लबाचे भायर आमचे कांय कर्मचारी गळ्यांत वळखपत्रां घालून क्लबाचें प्रमोशन करतात. ते टावट्स न्हय. पूण हेर बेकायदो टावट्सा विशीं आमकां कल्पना ना. बेकायदो टावट्सा आड सरकारान खर कारवाय करची. ते खातीर आमची कळंगूट पंचायत आनी ग्रामस्थांक मजत करपाची तयारी आसा अशें नरेश गिडवानीन सांगलें.

कळंगूट पंचायतीन आमकां नोटीस दिल्या, पूण ती बेकायदो बांदकामा विशीं आसा. आमचो वेवसाय बेकायदो आसा अशें खंयच तांणी नमूद केल्लें ना. तशा आशयाची नोटीस आयल्यार आमी जाप दिवं अशेंय गिडवानीन सांगलें.

जे सुवातेर बारबाला नाचतात आनी तांचेर पयशांची उधळण करतात तो डान्सबार. पूण आमच्या क्लबांत पोल डान्स वा हेर गैरप्रकार चलनात. आस्थापनांत वेट्रेस आनी डान्सर चलयो आसात. पूण डान्सबार ही संकल्पनाच आमचे कडेन ना. आमच्या क्लबांत स्टॅग अॅण्ट्री आसा, असो दावो विपीन सिंगान केलो.