भांगरभूंय | प्रतिनिधी
दुष्यंत कुमार गौतम: काँग्रेसीचे ‘देश जोडो’ यात्रेचेर केली टिका
वास्को: येता ती लोकसभा वेंचणूक सत्याचो असत्याचेर जैत अशी आसा. हातूंत देशाचे प्रधानमंत्री नरेंद्र मोदी हे जैतिवंत जातले हातूंत दुबावूच ना. येता ते लोकसभा वेंचणुकेंत भाजपाक 350 परस चड सुवाती मेळटल्यो अशें भाजपाचे राष्ट्रीय सरचिटणीस दुष्यंत कुमार गौतम हांणी सांगलें.
काँग्रेसीन सुरू केल्ले ‘देश जोडो’ यात्रेचेर तांणी टिका केली. ती काँग्रेस जोडो यात्रा आसून देशांत काँग्रेस नानपयत जायत आसा. एक अनामत रक्कम जप्त जावपी पक्ष म्हणून काँग्रेस पक्ष उरला अशें तांणी म्हणलें.
मुरगांव, वास्को, दाबोळी, कुठ्ठाळी मतदारसंघांतले कांय मुखेल कार्यकर्त्यां सयत तांणी सांकवाळे पंच तुळशीदास नायक हांच्या घरा बसका घेवन मार्गदर्शन केलें. ह्या वेळार वास्कोचे आमदार कृष्णा साळकर, मुरगांवचे आमदार संकल्प आमोणकार, आदले खासदार अॅड नरेंद्र सावयकार, आदले आमदार दामू नायक, मुरगांवचे नगराध्यक्ष लिओ रॉड्रिगीश, चिखलीचे सरपंच कमलाप्रसाद यादव, वास्को भाजपा मंडळ अध्यक्ष दीपक नायक, दाबोळी भाजपा मंडळ अध्यक्ष संदीप सूद, कुठ्ठाळी भाजपा मंडळ अध्यक्ष नारायण नायक, जिल्हो पंचायत वांगडी अनिता थोरात, जयंत जाधव तशेंच सांकवाळ, चिखली, कुठ्ठाळी, बोगमाळो पंचायतीचे कांय पंच वांगडी हाजीर आशिल्ले.
काँग्रेसीन भारत जोडो यात्रा सुरू केल्ली आसली तरी तिचे नियतीची कल्पना लोकांक आसा. प्रधानमंत्री जावपा खातीर पं. नेहरू हांणी देशाचे दोन तुकडे केले. चीनाक सुमार 15 हजार चौखण किलोमीटर भारताची जमीन दिली. काँग्रेसीचे कांय जाण दुस्मान देशां कडल्यान निधी स्विकारतात असो आरोप गौतम हांणी केलो.
नरेंद्र मोदी हे संस्कृतीभाव, धर्मीकभाव, राजनिती भाव आदींनी देशाक जोडपाचें काम करीत आसात. जाल्यार विरोधी पक्ष संस्कृती नश्ट करूंक पळयता अशें तांणी म्हणलें. एका राजकी पक्षान एका सोऱ्याचे बाटलीचेर एक सोऱ्याची बाटली फुकट दिवपाचें काम सुरू केलां अशी टिका तांणी केली. लोकांनी नरेंद्र मोदी हांकां परतून प्रधानमंत्री करपाचो संकल्प केला. मोदी हांणी लोकांच्या काळजांत सुवात मेळयल्या. नरेंद्र मोदी हांकां टक्कर दिवपी फुडारी विरोधी पक्षां कडेन नाशिल्ल्याचो दावो गौतम हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
