भांगरभूंय | प्रतिनिधी
म्हापशें: बार्देस बाजार संस्थेच्या अध्यक्षपदार निखीलचंद्र खलप हांची बिनविरोध निवड जाली. काल (बुधवारा) सकाळीं अध्यक्षपदाची निवड करपा खातीर संस्थेचे म्हापशेंचे मुखेल कचेरेंत संचालक मंडळाची खाशेली बसका जाली. ह्या वेळार 14 संचालकां मदले 13 जाण हाजीर आशिल्ले. भलायकीच्या कारणाक लागून जोजफ कुटो गैरहाजीर रावले.
जाल्यार बसकेक उपाध्यक्ष चंद्रकांत शेटगांवकार, धर्मा चोडणकार, महादेव नाटेकार, अॅड. पुनम नायक, नारायण राटवड, एकनाथ नागवेंकार, रघुवीर देसाय, गोकुळदास शिरोडकार, निर्मला खलप, शशिकांत कांदोळकार, प्रमोद कर्पे, बापू तुयेंकार आनी निखीलचंद्र खलप हाजीर आशिल्ले.
निर्वाचन अधिकाऱ्यां मुखार निखीलचंद्र खलप हांचो एकूच अर्ज अध्यक्षपदा खातीर दाखल जालो. अनुमोदक म्हूण महादेव नाटेकार हांणी जाल्यार सुचक म्हूण रघुवीर देसाय हांणी सयो केल्यो. दुसरो अर्ज अध्यक्षपदा खातीर येवंक नाशिल्ल्यान निर्वाचन अधिकाऱ्यांनी खलप हांची संस्थेच्या अध्यक्षपदार बिनविरोध निवड जाल्ल्याचें जाहीर केलें. निर्वाचन अधिकारी म्हूण सहकार उपनिबंधक कचेरेचे लेखपाल सुप्रिया गांवकार हांणी जाल्यार सहाय्यक म्हूण अन्वेषा मयेंकार हांणी काम पळयलें.
मजगतीं, संस्थेच्या अध्यक्षपदा खातीर ही वेंचणूक अटीतटीची जावपाची चिन्नां दिसतालीं. पयलींच संचालक मंडळांत दोन गट पडिल्ले. पूण संस्थेच्या हेता खातीर संचालकांनी आपले भितरलो गैरसमज पयस करून एकठांय रावचें आनी अध्यक्षपद बिनविरोध वेंचून हाडपा खातीर कांय जाणांनी यत्न चलयिल्ले. वेंचणुकेच्या कांय वरां भितर सगल्या संचालकां मदीं एकमत जालें.
नवे अध्यक्ष निखीलचंद्र खलपान म्हणलें, बार्देस बाजाराचो उत्कर्श करून गोंयभर फांटे उक्ते करपाची संस्थापक रमाकांत खलप हांची मोख आसा. ही मोख येसस्वी करपा खातीर आमी सगले संचालक यत्न करतले. सामान्य लोकांक बरे तरेचो म्हाल सवाय मोलान दिवपाचो यत्न, तशेंच सहकार क्षेत्रांतलें मॉल उबारप ही आपली मोख आसतली अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
