भांगरभूंय | प्रतिनिधी
रमेश तवडकार: अखील गोंय दलीत महासंघा वतीन विद्यार्थ्यांचो भोवमान
पणजी: बरे विचार लोकांच्या मनांत रुजोवपा खातीर भारतरत्न बाबासायब आंबेडकर हांचे विचार आपणायले बगर पर्याय ना असो उलो गोंय विधानसभेचे सभापती रमेश तवडकार हांणी दिलो.
पाटो-पणजी हांगच्या गोवा राज्य सहकारी बँकेच्या सभाघरांत भारतरत्न डॉ. बाबासायब आंबेडकाराच्या 66व्या महापरिनिर्वाण दिसा निमतान अखील गोंय दलीत महासंघा वतीन खासा कार्यावळीचें आयोजन केल्लें.
ह्या वेळार मुखेल सोयरे म्हणून सावंतवाडीचे महेश परुळेंकार हाजीर आशिल्ले. तशेंच पत्रकार अवित बगळी, पेडणें नगरपालिकेचे नगरसेवक सिद्धेश पेडणेंकार आनी अखील गोंय दलीत महासंघ अध्यक्ष पुरुषोत्तम परवार ह्या वेळार हाजीर आशिल्ले.
सभापती रमेश तवडकार, आमी ज्या समाजांत जल्मले त्या समाजाचो दरेकल्याक अभिमान आसपाक जाय. आयज दरेकल्यान डॉ. बाबासायब आंबेडकाराची जीण समजून घेवपाची गरज आसा. ताका लागून दरेकल्याक शक्त मेळटली, अशें तांणी फुडें सांगलें.
महेश परुळेंकार हांणी, जिणेंत मार्गदर्शन गरजेचें. आयचे पिळगेन फुडले पिळगेक मार्गदर्शन करपाची गरज आसा अशें तांणी सांगलें.
ह्या वेळार पुराय गोंयांतल्यान दलीत भावांची नगरसेवक वा पंच म्हणून नेमणूक जाल्ल्यांचो सभपतींचे हस्तुकीं यादस्तीक भेटोवन भोवमान केलो. तशेंच संघटणे वतीन घेतिल्ले समाजीक विशयाचेर काव्य लेखन सर्तींतल्या जैतिवंतांक इनामां भेटयलीं. हातूंत अजय भगवान भामरे हाका पयलें, जाल्यार उमेश परवार हाका दुसरें, तिसरें दत्तहरी कदम, तशेंच सतीश निकम आनी दिपक तळवडेंकार हांकां उमेद वाडोवपी इनामां फावो जालीं.
दलीत समाजांतल्या भुरग्यांच्या शिक्षणाक उर्बा मेळची देखून यत्ता धावी, बारावी आनी पद्वी परिक्षेक येस मेळयल्ल्या विद्यार्थ्यांक ह्या वेळार शिश्यवृत्ती भेटयली.
तशेंच अखील गोंय दलीत महासंघ आनी कला आनी संस्कृती खात्या वतीन हालींच घेतिल्ल्या चोवथ्या अखील गोंय संत चोखामेळा भजन महोत्सवांतल्या जैतिवंतांक सभापतींच्या हस्तुकीं इनामां भेटयलीं.
सुरवातेक महासंघाचे अध्यक्ष पुरुषोत्तम परवार हांणी सगळ्यांक येवकार दिलो. अॅड. डी. एल. पुसेकार हांणी अहवाल सादर केलो. महासंघाचे सचीव फल्दीप पार्सेकार हांणी उपकार मानले आनी श्याम गांवकार हांणी कार्यावळीचें सुत्रसंचालन केलें.
ह्या वेळार महासंघाचें ‘भाग्यविधाता’ यादस्तीकाचें सभापती रमेश तवडकार हांचे हस्तुकीं प्रकाशन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
